Rajya Sabha MP Pu K Vanlalvena chuan vawiin khan Tlabung chhehvela India leh Bangladesh inrina dep hmun hrang hrang a tlawh a, sipaite chu ramri an ven dan zirchianga a kawm bakah, mipuite chu mamawh an neih zirchiangin a kawm bawk.

Zan hnih riaka Tlabung leh a chhehvel ramri tlawhtu Rajya Sabha MP Pu K Vanlalvena hian, ramri hung hna thawh mek ‘border fencing’ leh, ramri-a eng chhit hna kalpui mek ‘border flood lighting’ pawh tlawhin, chak zawka hna thawh zawh a nih theih dan tur sawipuiin contractor-te a kawm a, ramri-a eng chhit hna tun dinhmuna la thawh bak za zela 60 vel chu zawh thuai a nih theih nan theihtawp chhuah turin contractor-te a chah a ni. 

Ramri-a eng chhit hna thawktu Avantika Construction company-te chuan an hna thawh nan cheng vaibelchhe 100 ruahman a nih thu leh, hna thawh zawh nan sawrkar laipui Ministry of Home Affairs-in kum 2019 kum tir thleng khan hun a pek thu an sawi a, hun tiam chhunga an zawh hman tak loh avangin kum thum dang pek belh leh an ni tih sawiin, hna thawh tan leh theih a nih veleh chak taka hna thawh an tum thu an lo hrilh a ni.

Pu K Vanlalvena chuan, ramri-a chengte tih hmasawn leh dawmkan chu thil pawimawh tak a ni tih sawiin sipaite leh mipuite inkarah thawhhona leh inpumkhatna tha zawk a awm a pawimawh tih sawiin, inhriatthiam tawnna nena boruak tha tak hnuaia khawsak tlan a tul tih a sawi.

Rajya Sabha MP chuan, ramri vengtu sipaiten anmahni pualin Primary Health Centre an mamawha a hriat thu leh, sipaiten general/civil hospital an tawmpui chu a fel loa a hriat thu sawiin hemi chungchangah hian rawtna siama Sorkar laipuia bawhzui a tum thu a sawi a, dan loa ramri kana Bangladesh atanga an rawn luh ruk lohna tura theihtawp chhuah turin ramri vengtu sipaite a chah bakah, hemi danchah kawnga mawhphurtute thawhpui turin mipuite a sawm bawk.

Hei bakah hian, Tlabung leh Khawthlangtuipui ral lehlama khaw hrang hrang inkalpawh nan lei dawh kai chu thil pawimawh hmasa nia a hriat thu sawiin, sipaite tan pawh ramri ven hna an thawh kawngah a tangkai dawn hle tih a sawi a, ramri-a inkalpawhna kawng chu tun aia a that zawk a ngai tih sawiin, Sorkar laipuiah hemi chungchang pawh hi a tul anga thlena bawhzui a tum tih a sawi.

Rajya Sabha MP hian 60 Battalion BSF hnuaia border outpost pali tlawhin, 131 Battalion BSF hnuaia border outpost pahnih a tlawh a, Rajya Sabha MP leh amah tawiawmtu Tlabung SDO (C) Pu Lalsanglura, SDPO Pu Lalmuanpuia leh party hruaitu thenkhatte hi West Tuipui bialtu MLA Pu Nihar Kanti Chakma bakah, 60 battalion BSF Commandant Pu Vinay Yadav leh 131 battalion Commandant charge la mektu Pu Rajiv Prakash-ten an lo dawngsawng a ni.