1910/2023-2024

Aizawl, the 16th September, 2023: Rajya Sabha MP Pu K. Vanlalvena chuan Ward Corporator leh AMC hmalaknaa siam Republic Veng Lungli Tui Water Treatment Plant chu nimin khan khuallian niin a hawng a, tangkai taka hman turin Lungli Tuitlan Society hnenah a hlan nghal a ni.He hunah hian AMC Deputy Mayor Pu R. Thanglura chu khualzahawm a ni.

Khuallian Rajya Sabha MP Pu K. Vanlalvena chuan thu sawiin, AMC, bialtu Corporator leh Society member-te thahnemngaihna luangkhawm kaltlanga Lungli Tui tih thianghlim leh sawngbawlna tha tak hawn theiha peihfel a ni chu lawmawm a tih thu a sawi a. Tui tihthianghlim leh hrisel mai bakah a sem chhuahna thlenga mumal taka ruahman lawk a ni chu finthlak a tih thu a sawi a. Tangkai taka hman a niha a chhawrtute tana malsawmna a nih ngei theih nan duhsakna a hlan a ni.

A hawnna leh inthlanna hun Lungli Treatment Plant, Republic Venga hman hi Ward XVII Corporator Pu David Zohmangaiha chuan a kaihruai a. Tarlan a nih danin Lungli Water Treatment Plant siam nan hian Rs. 14,00,000/- sen a ni a, he hunah hian Lungli Tuitlan Society-te chuan Ward Corporator leh AMC hotute hmalaknaah lawmthu an sawi a ni.

Lungli Tuikhur tuihna humhalh hi March 4, 1996 atang khan tan a ni tawh a. Tui tlantuten mumal taka tui thianghlim leh hrisel mahni chenna in theuha an lak luh a, an tlan theih nan hmalak nghal niin 'Lungli Tui Tlan Society' din a ni a. Society member hi chhungkaw 232 vel an ni mek a, a hnathawhna huam chin (Area of operation) hi - Republic Venghlun, Upper Republic leh Mission Veng te a ni. Society hian inkaihhruaina dan mumal tak a nei a, tui haw dan tur bithliah mumal tak viltu ruaia ruahman a ni a. Member-te atanga kum tin member fee  Rs. 250/- khawn atangin tul angte hmalak thin a ni.