1072/2026-2027

Aizawl, the 18th June 2026 : Pu Khiangte Laltluangkima, ZPM candidate chu vawiin khan Mizoram aiawh tur Rajya Sabha MP thar atan thlan tlin a ni. Election Commission of India (ECI) remruatna angin vawiin khan Mizoram Legislative Assembly-a MLA 40 zinga MLA 36 te chuan Mizoram aiawh tur Rajya Sabha MP thlanna atana hmun ruahman Conference Hall,  Mizoram Legislative Assembly Secretariat (Annexe building)-ah vote an thlak a ni.

Vote tla te hi tlai dar 5:00 khan ECI phalna hmuh hnuin chhiar nghal a ni a, result hi Fax-in ECI thawn niin ECI lamin result puan phalna an pek hnuah Pu Zothansanga Ralte, Mizoram Legislative Assembly-a Commissioner & Secretary leh he inthlanna atan a Returning Officer ni bawk chuan Pu Khiangte Laltluangkima chu Rajya Sabha MP atan thlan tlin a nih thu a puang a ni.