Mizoram Rajya Sainik Board chu vawiin khan Raj Bhavan Conference Hall-ah an President Mizoram Larsap, Lt. Gen (Rtd.) M.M. Lakhera hovin an thukhawm a. Member dang Mizoram Chief Minister Pu Lal Thanhawla; Home Minister Pu R. Lalzirliana; Col Z.S. Zuala, MLA; Pu Hmingdailova Khiangte, MLA; Chief Secretary Pu Vanhela Pachuau bakah Mizoram leh pawnlam atanga mi pawimawh engemaw zat an tel.

Inkhawm kaihruaitu Larsap chuan member-te lawmna thu a sawi hmasa a. Meeting hmasa leh tun inkar chhunga Board hmalakna hrang hrang tarlangin chungte chu nghawng tha leh rahchhuah tak tak an nih thu a sawi a. Indopui II na tuartu leh an boral san hmeithai  1301 hnenah Rs. 71.5 lacs zangnadawmna hlan an ni a ti a. July 2009 atang khan Indopui Veteran te hnenah lawmman thla tin Rs. 1000/- leh an boral san hmeithaite hnenah Rs. 800/- thlatin a tih pun an nih tawh thu te, January 2010 atang khan sipai bangte tana ruahman Health Scheme-ah member 1141 an awm thu leh hemi kum chhung vek hian sipai bang dam lo enkawl nan Rs. 50 lakh hmanral a nih dan te a tarlang bawk.

Vawiina Rajya Sainik Board thukhawm hian meeting hmasa 12 March 2009 a an thurel a pawm. Rashtriya Mantri’s Discretionary Fund (RMDF) hmanga sipai bangte In sak thatna atan Mizoram-ah mi 264 hnenah Rs. 49.79 lakh hman ral thu ngaihthlak a ni a. Sipai bang Health Scheme kalpuitu Aizawl Greenwood Hospital a sipai bang enkawl zat tarlangin damdawiin dangte pawhin he scheme hi zau zawkin kalpui thei se tih rel a ni bawk a. Sorkar laipuiin sipai bangte tana K.Oil a pek thin a tih tawp  tak avanga LPG gas ruahman sak dilna vawi duailo thlen tawh chu sorkar laipuiah ngaihtuah mek a nih dan leh bawhzui lai thil anih thu vawiin board meeting hian a tarlang bawk. Mizo Scouts Battalion din rawtna te, sipai bangte tan Home Guards a luh theih dan kawng te, District Housing Loan Board ah sipai bang aiawh telh ve rawtna te,  Sainik Welfare and Resettlement Board a hnaruak hnawhkhah chungchang te, District Hqrs. Zila Sainik Office ah staff dah chungchang te, 1971 India leh Pakistan indo hliam tuar chhawmdawl thu leh 6th Pay Commission in a nghawng tur sipai bangte tana pension leh arrear chungchangte chu vawiin board meeting thu ngaihtuah zingah hian an tel a ni.