316/2023-2024

Aizawl the 4th May, 2023 : Vawiin khan NE Khawdungsei YMA Hall ah State Level Seminar on Ralngama leh Tlangkhama Hlate Zirna hun hman a ni. Dr. L.Thangmawia chu khuallian a ni. He seminar, Mizo Academy of Letters leh NE Khawdungsei Branch YMA te buatsaih hi Prof. RL. Thanmawia, President MAL chuan a kaihruaiin, Dr. Zoramdinthara, Secretary MAL chuan seminar report a pe a.

He huna khuallian Dr. L. Thangmawia MLA chuan, hla phuahthiam pahnih Ralngama leh Tlangkhama hlate zirna an pianna khua NE Khawdungseiah ngei neih a ni chu a lawmawm thu leh hlu hlea a hriat thu sawiin, thu leh hla hi khawvel thiamna sang zelah hian ngaihthah theih a nih loh ziate, mihringte min phuar khawmtu leh min fuihtu, beidawnna leh manganna ruama kan awm lai pawh a min hnemtu leh min fuih thartu a nih avangin kan ngaihhlut deuh deuh tul a tih thu a sawi a. Khuallian Dr. L. Thangmawia chuan thu leh hla ziaktute chu mi tlawmte, an hunlaia mite ngaihsan ni lo mahse, an thu leh hlate erawhin an hlutzia an tilang deuh deuh dawn a ni tih a sawi bawk.

He seminar ah hian Dr. H. Laldinmawia Asst. Professor PUC, Dr. Lalthasanga Principal HSS, NE Khawdungsei, Dr. Lalhlimpuii Asst. Prof. MCC, Dr. Thanghmingliana, Asst. Prof, Govt. T. Romana College te paper zirho a ni. He hunah hian pu K. Lalnunfela DEO, Saitual District, MAL hruaitute, VC Member, khawchhung tlawmngai pawl hrang hrang te leh Higher Seconday zirlaite pawh an tel a ni.