1148/2024-2025

Dated Lawngtlai, 11th July, 2024 :  Vawiin khan Lawngtlai District-a raltlan leh 'essential commodities' chungchang ngaihtuaha thutkhawmna DC Office Chamber- ah neih a ni a. Thutkhawm hi Pu Cheemala Siva Gopal Reddy (IAS) Deputy Commissioner chuan a kaihruai.

Pu Cheemala Siva Gopal Reddy chuan 'Essential Commodities' phur lirtheite chu mipuite mamawh phurtu ber an nih angin   an kalna tur hmun an thlen ngei a pawimawh hle a ti a. Mimal YLA hminga pawisa khawn duh vanga lirthei lo dang thin an awm nia a hriat thu sawiin, hei hian YLA hming a tichhe thei dawn hle tiin CYLA  chu pawisa khawn chingte zawng chhuak leh a tul anga hmalakpui turin a sawm a. A bik takin CYLA chu NGO lianber an nih angin hmahruaitu ni turin a ngen a ni. Central sawrkar atangin tanpuina tam tak dawn thin a ni a, harsatna siam zawng ni lo a, sawrkar kan thawhpui tlat  chuan tanpuina tam zawk kan dawng thei dawn a ni tiin, zalen taka sumdawnna a kal pawh tul hle a ti a. Mizoramin tuialhthei a lakna ber Assam lama lei chim vangin tuialhthei duh khawp hmuh a ni lo a, tunah chuan harsatna engmah awm tawh lo in Lawngtlai district mamawh zat tuialhthei a awm mek tih a tarlang.

Pu Cheemala Siva Gopal Reddy chuan Myanmar leh Bangladesh ram buai vangin Lawngtlai district- ah raltlan tam tak an lo lut tih a tarlang a. Ramri lo kan te chu refugee an nih angin a theih chin chinah tanpui thin a ni, a ti a. NGO te pawhin theihtawp an chhuah tih a hriatpui thu sawiin, fimkhur taka hmalak erawh a tul hle a ti. Ram leilung fate him leh zalen taka an awm chu thil pawimawh hmasa anih thu tarlangin raltlan chungchangah ngaihtuahna thuk  zawk neih a tul rualin NGO- te nena lungrual taka thawhho pawh a tul hle a ti a. Lawngtlai dsitrict chhunga raltlan awm mekte nawrchhuah tumna engmah a awm lo tih sawiin Pu Cheemala Siva Gopal Reddy chuan ahranpaa sawrkar atanga raltlan  tanpuina a awm loh  avangin raltlan tam zawk lo lut tur erawh kan dawlzo dawn lo a, kan dawl zawh tawk hriat a tul hle a ti.

Tun dinhmunah Lawngtlai khawpui chhung ngeiah Rakhine State (Myanmar) mi leh sa an awm tih thawm a lo hriat thu tarlangin Pu Cheemala Siva Gopal Reddy chuan Assam Rifles nen inkawmna pawh an neih tawh thu a tarlang a. Ramri khauh zawka venghim tura hmalak mek zel a nih thu sawiin, Police patrolling pawh zing leh khauh zawk a kalpui a ni, a ti. NGO te ngenna anga 'Security Check Post' tam zawk siam chu thil pawimawh tak a ni tiin bawrhsap chuan thuneitu sang zawk hnena thlena, atul ang zel a hmalak  a ni ang a ti.

Central Young Lai Association (CYLA) chuan dan lo a sumdawnna a awm vangin tuialhthei phur (tanker) dan a nih thu sawiin, mipuite tana harsatna thlen tumna engmah a awm lo an ti a. Bungraw phur motor bikah dan phalloh phur an awm leh awm loh erawh endik thin a ni tiin, dan ang thlapa bungraw phurte dan a ni ngai lo an ti. CYLA chu tlawmngai pawl a nih ang takin mipui tana thawk an nih piah lamah sawrkar tha tichaktu ni tura an awm reng thu an tarlang  bawk. CYLA hian Bawrhsap hnenah  - Lawngtlai district mipuiten hnianghnar taka tuialhthei an neih nana stock monitor turte, Rakhine mi leh sa Lawngtlai district- a lutchhuak fel fai taka chhinchhiah turte, Lawngtlai khawpui chhunga Hotel nei ten Valid ID demand zel tura hmala tur te, Lawngtlai district-a Bawm raltlan lo kal nawrlet lo tur te, Lawngtlai district mipuite an him zawk nana thingtlang khaw lama security check post leh temporary beat post dah tura hmalak sak tura ngenna an thehlut a. LWA, MHIP leh MUP te pawhin CYLA ngenna hi an pawmpui thu an sawi bawk.

Pu Chhemala Siva Gopal Reddy (IAS) District bawhsap chuan CYLA, MHIP, LWA, MUP te ngenna siam chu zawhawm a tih thu sawiin a tul anga hmalak a nih tur thu a hrilh a ni.

Vawiin thutkhawmah hian Pu H. Zonunmawia, (PD),Pu Tlualaisa Hlychho (Addl. SP), Pi Margaret J. Vanlalremmawii (SDO, Sadar), Pu Robert S. Beirosa (SDPO), Pu Samuel Lalmalsawma Sailo (SDC), Dr. Doris Lalrinawmi, SDC, bakah CYLA, LWA, MHIP leh MUP aiawhte an tel a ni.