1147/2024-2025

Aizawl, the 11th July, 2024: Tukin dar 7:30 khan Sports & Youth Affairs Minister Pu Lalnghinglova Hmar, Aizawl West-II bialtu MLA ni bawk chuan a bial chhung Dinthar-a Local Council House-ah Dinthar Local Council, NGO leh political party aiawhte kawmin khawtlang mamawh hrang hrang leh hmalak dan turte a sawipui a, hemi hnu hian Dinthar thlanmual leiminna hmun a tlawh nghal bawk.

Dinthar khawtlang hruaitute’n mamawh an thlen zingah vengchhung inkalpawhna kawng changtlung zawk neihte, êng (power) tha leh regular zawkte, infiamna hmunhma tihhmasawn bakah, vengchhung mipuite’n tui in tur thianghlim leh hnianghnar an neih theih nana hmalakte a tel a ni.

He hunah hian bialtu MLA chuan Mizoram Building and Other Construction Workers Welfare Board (MBOCWWB) hnuaia kuthnathawktu, construction worker-te tana hamthatna awm theite sawiin, mipui nawlpui hriata puanzar dan turte sawiho a ni a. Khawtlang leh kohhran tangruala ruihhlo do leh ruihhlo ngaite chhanchhuah dan ngaihtuahhote, zirna in hrang hranga zirtirtu indaih zawka kalpui dan turte sawiho a ni bawk.

Inkawmhona neih zawhah Sports & Youth Affairs Minister Pu Lalnghinglova Hmar chuan Dinthar thlanmuala leimin leh lei che chu a hmunah a tlawh a; chhiatna nasa zawk a thlen loh nana hmalak dan turte khawtlang hruaitute nen an sawiho nghal a ni.

Aizawl West-II bialtu MLA Pu Lalnghinglova Hmar hian kar hmasa atangin a bial chhunga veng hrang hrangte a tlawh kual a, ruahman dan chuan tun Inrinni hian tlawh chhuah hman beisei a ni.