Vawiin khan Civil Secretariat, Khatla, Aizawl-ah Pu Lalrinliana Fanai, IAS, Commissioner, Home Department hovin dan lova Bangladesh atanga ramchhung rawn lutte ngun zawka enfiah leh thlithlai dan tur ngaihtuahin thutkhawm a ni a, he meeting-ah hian Bangladesh ramri depa awm District-3 (pathum) DC leh SP te, CADC hotu te, ramri vengtu sipai BSF-te leh tlawmngai pawl 2 (pahnih) YMA leh YCA-te an tel.

He meeting-ah hian Bangladesh ram atanga dan lova rawn pem lut thinte State Sawrkarin a ngaih thutak thute leh a theih ang china anmahni lo danga dapchhuak tur leh thawn haw tura theihtawp chhuah a tum thute tarlan a ni a. Hemi atana hna hmasaah Ministry of Home Affairs (MHA) Government of India-in phalna neilova Bangladesh mite thawn haw dan tur kaihhruaina ni 23.11.2009-a a lo siam tawh zulzuia Special Task Force Committee, DC Chairman-na hnuaia, heng Mamit, Lunglei leh Lawngtlai District-a lo din tawh tihchangtlun leh chak zawka hna thawhtir dan turte rel a ni.

District Level Committee bakah hian ramri kana rawn lutte awlsam zawka hriat chhuah an nih theih nan Civil Sub-Division Level-ah Committee hran din tum a ni bawk. He Committee-ah hian Civil Sub-Division huam chhunga SDO(C), BDO, Police, BSF leh khaw tina VCP zawng zawng bakah tlawmngai pawl hrang hrangte tel tura beisei an ni. Heng Committee-te hi thla 3 danah thukhawmin State sawrkar hnenah an hmalakna report thehlut ziah thin tura tih an ni.

Heng bakah hian International ramri vengtu BSF-te pawh phalna nei lova ramri kante dapchhuah kawngah tun aia nasa zawka tan la turin hriattir an ni.