Khawvel boruak, sik leh sa inthlak danglam mek hmachhawn dan tur chungchang zirhona, Capacity Building Programme on Climate Change Adaptation in Mizoram, Training Programme for State Level Officials chu Mizoram Science, Technology and Innovation Council(MISTIC) hnuaia Mizoram State Climate Change Cell leh NABARD Consultancy Services(NABCONS) te buatsaihin vawiin khan Secretariat Conference Hall ah neih a ni a. Chief Secretary Pu Lalmalsawma chuan he Training Programme hi Khuallian niin a hmanpui a ni.
He Programme hi Department of Science & Technology, Government of India leh Swiss Agency for Development and Cooperation(SDC), Embassy of Switzerland, New Delhi te thawhhona hnuaia Indian Himalayas Climate Adaptation Programme(IHCAP) hmalakna hnuai ami niin National Mission for Sustaining the Himalyan Ecosystem(NMSHE) thil tum pawimawh ber pakhat a ni a. Dr. C. Vanlalramsanga, Secretary, Planning Department chuan training programme hi a kaihruai a ni.
Chief Secretary chuan boruak sik leh sa inthlak danglam chak takin a nghawng chhuah tuilian, leimin, ruah tlak dan mumal lo ten mihring khawsakna ah chhiatna leh harsatna tam tak a thlen mek chu Himalaya tlangdung ram dangte ang bawkin Mizoram pawhin a takin kan tuar ve mek tih a sawi a. Chak taka boruak lum chho zelin tun atanga hun reilo te ah khawvel ram hrang hranga mihring maktaduai tel khawsakna a tihbuai chhoh zel dan tur te ngaihtuahna nen, Mizoramin harsatna a tawh theih tur te uluk taka lo thlir lawk a, a hmachhawn dan tur a inbuatsaih a pawimawh tak meuh a ni, a ti a. Himalaya tlangdung leh a chhehvel leilung leh boruak vawnghim nana sorkar hmalakna ah he training hian rah tha tak a chhuah a beisei tih a sawi.
Training ah hian Dr.Divya Mohan, Science Policy Officer, IHCAP, New Delhi chuan IHCAP hmalakna te tarlangin Himachal Pradesh Kulu district a ruahtui tlak dan te, khuarel chhiatna chi hrang hrang thlen dan leh an tawrh natna lai te hrechiang tura baseline data an neih dan leh hemi atanga Mizoram tana hman tangkai ve theih tur te a sawi a. Suraj Pandey, Consultant, Climate Change NABCONS chuan Climate Change Programme hnuaia project hrang hrang te leh project siam dan tur ah te zirtirna a pe a. Dr.James Lalnunzira Hrahsel, Project Scientist, Mizoram State Climate Change Cell chuan Mizoram hmun hrang hranga data an lakkhawm atanga kum 31 chhunga Mizoram sik leh sa inthlak danglam chak dan leh ruahtui tlak dan te a sawi bawk a. Mithiamte presentation atang hian department hrang hrang ten sawihona neiin vawiin training programme hi Dr. R.K.Lallianthanga, Chief Scientific Officer leh Member Secretary, Mizoram Science & Technology and Innovation Council(MISTIC), Directorate of Science & Technology chuan lawmthu sawiin a khar a ni.
