Mizoram sorkar Home Department hnuaia police constable lak tur chungchangah Home Minister Pu R.Lalzirliana chuan nimin khan chanchinbumi thenkhatte kawmin mipuite hriat tura a duh thu pawimawh a sawi. Nimina a pisaa mipuite hnenah thuchah a sawinaah hian Mizoram DGP Pu Thianghlima Pachuau, IGP Pu Zorammawia leh DIG (Trg) Pu C.Laldina ten Home Minister an tawiawm a ni.
Armed Constable 375 leh Un-Armed Constable 75 lakna phalna (vide order No.A.12024/1/2013-HMP/73 dt.1.9.2017) chu sorkarin ni 1.9.2017 khan a chhuah a, ngun taka ngaihtuah a nih hnuin District hrang hranga la lovin Aizawl District-ah lak vek nise tih a ni a. Ni 26.9.2017 khan Recruitment Board, DIG Chiarmain-na hnuaiah din chuan a hnuaia mi ang hian Police Constable lak dan tura ruahman chhin a ni a; khawchhiat leh thildang harsatna avangin tul anga tihdanglam zeuh zeuh thei a ni ang a. Khawchhiat deuh avangin Written Test pawh 1st November, 2017 ni lovin 3rd & 4th November, 2017-a neih theih tura ruahman chhin leh a ni a, hei pawh hi khaw awmdan azirin sawn leh hret thei a ni ang.
Recruitment Board-in a ruahman chhin danah chuan :
Interview dates : 20.11.2017 atangin (tentative)
Declaration of Results : 15.12.2017 (tentative)
Date of Basic Training : 15.1.2018 (tentative) tih a ni a, amaherawhchu khawchhiat leh harsatna dang a awm chuan a chunga nite hi thlak danglam theih an ni ang.
Home Department hnuaia Armed & Un-Armed Constable lak tur chungchangah Home Minister Pu R.Lalzirliana chuan politics avang emaw thildan avang emaw induhsak uchuak a awm dawn loh thu a sawi a. Mizo thalaiten hna an zawng nasa a, police constable lak turah pawh hian dilna lachhuak ringawt pawh mi 25000 an chuang a, mipa 931 leh hmeichhia 491 te erawh chu registration-ah an tla nghal a, mipa 341 leh hmeichhia 254 te chu physical test-ah an tla leh bawk a; Constable hna dil tur qualifiation Class VIII chauh a nih laiin a diltute zingah Post Graduate leh Graduate te hial an tel chuan thalaiten hna an zawn nasatzia a tichiang hle a ni, a ti. Pawl 8 pass chin tan tih a nih angin, a zir sang tan chance a tha chuang lova, zawhna pawh Pawl 8 pass chin chhan tura set a ni ang a, a titha lak a ni ang tih a sawi a. Tuna Police Constable lak tura Hmeichhia Quota tur pawh ngaihtuah tel a ni a, Unarmed post 75 atanga chhut tur a ni angin 25% chu hmeichhia lak tura ruahman chhin a ni a, tun dinhmunah Mizoram Police-a hmeichhiate hi 1% pawh an la tling lo a ni tih Home Minister chuan a tarlang bawk.
Home Minister chuan Police hotute leh ama mimal ngaihdanah pawh pawl leh mimal ni lovin ram rawngbawlnaah ngaiin tling lo tlin luih tir emaw duhsak bik emaw neih an tum loh thu a sawi a. Police lak dan result-ah lungawilohna (complaint) thehluh theih a nih tur thu sawiin Pu R.Lalzirliana chuan result zawng zawng dahthat vek a ni ang a, dik veka chhanga inngai tling si lote tan complaint thehluh a, an chhanna-te enho leh theih a ni ang, a ti. Tum dangah chuan ex-servicemen, police pensioner leh homeguard chhungkuate tan quota siam thin chu post lak tur a tlem avangin dah a ni hran dawn lova, ex-servicemen-te bik erawh chu sorkar laipuiin a ngaih pawimawh em avangin 5% quota dahsak an ni ang, a ti. Quota hran siam lo mahse sportsperson leh NCC atan erawh merit mark siam a ni ang a, a theih chin chinah police thi tawh/chawl tawh leh sorkar hnathawk awmlohna chhungkua atanga tlingte duhsak an tum tih a sawi a ni.
