Mizoram Secretariat Service Association (MSSA) chuan vawiin khan Synod Conference Centre, Aizawlah General Conference vawi 13-na an hmang a. Sports Minister Pu Zodintluanga chu khuallian a ni.

Pu Zodintluanga chuan sawrkar hnathawkte hian department hrang hrangah hna inanglo tak tak an thawk a, an vaiin mipui leh ram tana thawk an ni tiin sawrkarin hlawh tha tak a pek nachhan hrerengin kan eizawnna hna hi chhiat ni leh that ni zawng zawnga tel kim vek tuma kal paha thawh chi a ni lo, a ti a. Company lian tak tak awm ve lohna Mizoramah sawrkar hna hi hna tha leh hlu, mi te thawh chak a ni a, hetiang thawk theia kan awm hi kan vanneihzia hriain theihtawp chhuah hi kan tihmakmawh leh kan hnain min phut tlat a ni, a ti. Mizoram Secretariat Service hi sawrkar inrelbawlna kawngah a kila lung pawimawh, sawrkar dan hrang hrang zam leh ken kawh thuah te, service rules chungchangah te dinhmun pawimawh tak chelhtu an ni, Minister chuan a ti a. Sawrkar hotute an finchhuahna kawngah thu lai la taka an thiamna leh hriatna hmang tura fuihin mahni tanghma hai chunga hna an thawh chuan khua reiah ramin a la tuar dawn, a ti. Minister chuan mipui tana thawktu leh mipui tana awm an nih hrerenga theihtawp chhuah tur leh mipuite tana dawr nuam leh tanpuitu ni zel turin MSS member-te a sawm a ni.

MSSA Conference Plenary Session hi an President Pi K.Vanlalrawni, Additional Secretary Agriculture chuan a kaihruai a. An member thi mi pathum - Pu Zosangzuala, Pu R.Zohmingthanga leh Pu PC Lalrosanga te sunna hun an hmang bawk a ni.

Chawhnu programme hi an Vice President Pu Lalringa Sailo chuan kaihruaiin hruaitu thar thlanna hun an hmang a. Member tharte leh kaisangte lawmna hun hman a ni bakah report ngaihthlak niin tha zawka sawrkar hnathawh dan tur nia an hriat sawihona hun an hmang a. An President Pi K.Vanlalrawni’n thu a sawi bawk.

MSSA hruaitu thlan thar te chu -  Pi K.Vanlalrawni, Additional Secretary, Agriculture; Pu F.Lalrinawma, Jt. Secretary, Finance; Pu Lalrinsanga, Jt. Secretary, DP&AR; Pu C.Lalrosanga, Deputy Secretary, Land Revenue & Settlement; Pi H.Vanlalchhuangi, Deputy Secretary, Finance; Pu TC Lalkhuma, Deputy Director, ICT;  Pi Zonunthari, Under Secretary, Land Revenue & Settlement; Pi Betsy Zothanpari Sailo, Joint Director, ATI; Pu Zahmingthanga, Superintendent, Home leh Pu Lalsangpuia, Deputy Directorm, Irrigation and Water Resources Department te an ni.