Mizoram Governor Lt. Gen. (Retd) Nirbhay Sharma PVSM, UYSM, AVSM, VSM chuan vawiin chawhma khan Aizawl khawpui chhunga kohhran hrang hrang hmunpui chu tlawhin, khawtlang tana thawhho puiah a sawm a ni. 

Governor chuan Tuikhuahtlanga United Pentecostal Church (UPC) Mizoram hmunpui, Tuikuala The Salvation Army, India Eastern Territory Headquarters leh Motherless Babies Home, Chanmari-a Baptist Church of Mizoram, Aizawl Area hmunpui leh Dawrpuia Aizawl Mosque te a tlawh a ni. 

UPC Mizoram hmunpuiah hian General Superintendent Dr. Ngurthanpuia Sailo hovin an lo dawngsawng a. Governor Lt. Gen. Nirbhay Sharma chuan thu sawiin, Mizoram chu India rama state ralmuang ber a nihna chhan chu a chhunga cheng te vang a ni, a ti a. Kristian kan nih angin kan rinna ah kan chian a ngai a, chutih rualin sakhaw dangte kan hriatchian a inzirtirna tha an neih te erawh entawn kan hreh loh a ngai a ni, a ti. Thalaite tibuai thei thil ruihhlo, zuk leh hmuam bakah HIV/ AIDS lama sawrkar leh tlawmngaipawl hemi kawnga hnathawk mekte chu thawhho pui tur in a sawm a ni. 

The Salvation Army, India Eastern Territory Headquarters chu tlawh lehin Territorial Commander Commissioner Lalzamlova te nupa leh hruaitu dang ten an lo hmuak a. Governor chuan an rawngbawlnate chu tha a tih thu sawiin, hriselna lam hawi zawnga hma la zel turin a chah a ni. The Salvation Army enkawl, Motherless Babies Home chu tlawh nghal in, a thawktute nen inkawmna hun hmangin, naupangte thilpek a hlan bawk a ni. 

Baptist Church of Mizoram hmunpuiah hian Aizawl Area Executive Secretary Rev. R. Lalrinthanga nen inkawmna an nei a, Governor chuan sakhua dangte zirtirna hriatchian a, kan inzahtawn thiam a tul a ti a. Kan hriatchian loh avangin sakhua dang vuantute nen kan inkarah inngeih lohna leh tharum thawhna a thlen phah thin a ni, a ti. 

Hemi zawh hian Aizawl Mosque hruaitute nen inkawmna hun an hmang bawk a ni.