Vawiin hian Lawngtlai Addl. DC Office Chamber ah Lawngtlai District Fire Prevention Committee leh Lawngtlai khawpui chhunga Village Councils aiawhten kumin thal chhunga ram kang laka Lawngtlai District a fihlim theih dan tur relin an thukhawma. District Level Fire Prevention Committee chairman, Bawrhsap aiawhin Addl DC Pu R. Lalsangluaia’n he meeting hi a kaihruai.

Addl. DC Pu R. Lalsangluaia chuan, vanneih thlak takin nikumah khan kan District hian kangmei laka inveng tha lawmman pakhatna sawrkar atangin kan dawng hlauh mai a, he lawmman ropui tak kan dawn theih nan hian tlawmngaipawl, sawrkar hnathawk, chanchinbumi, kohhran leh khua leh tuiten an chhuah a, an chungah kan lawm em em a ni. Kuminah pawh pakhatna nih leh ngei kan tum tlat a, kan nih leh ngei theih nan Lawngtlai District mipui zawng zawngte theihtawp chhuah turin kan sawm tak meuh meuh a ni, a ti.

Meeting chuan, khawtinte chu meilam sialin nihnih hnatlangin thawk theuh se, kangmei chhuak palh thei thlithlai reng tu tur mi pakhat ruat theuh bawk se, tih te. Kangmei chhuah palhah VC ten a thelh turin mipui kokhawm in rang takin hma la thin se, District Level hotute pawhin a tul dan ang zelin kangmei thelhna lamah thawkrim deuh khuate chu an thingpui man tur leh thil dangte ngaihtuah sak thin se, an ti. Tin, Lo hal apiangten an lo hal atangin mei an chhuah leh chhuahloh an finfiah fel vek hma chuan an lohal chu haw san mai lo se tihte, meilam sial lova lo hal leh hun tiam pelh hnua lo hal te phei chu an chunga hremna lek ngei dan ngaihtuah ni se an ti a. Hengte bakah hian District chhung kawngpui pengthuam pawimawh laiah kangmei laka fimkhur tura in ngenna banner a tam thei ang ber tarte, MTKP khawmpui lian neihna hmun remchang laia ramkang laka fimkhur tura inzirtirna Banner lian tar dil leh TV a tihchhuah tur Skit siam te an rel bawk a. Phawngpui tlang kangmei laka a him theihnan a chhehvel khuatea Awareness Campaign, tun thla ni 27 ral hma ngeia nei tur leh Rulkual - Paithar tlangdung khuateah pawh Awareness neih an rel bawk. Tin, District chhunga kawngpui pawimawh zual enkawltute hnenah kawngpui kam sirtuak meiin a man mai theih loh tura fai taka sam fai tura ngen ni se, tiin a rel bawk.