Vawiin hian DC Conference Hall ah District Level Vigilance & Monitoring Committee an thukhawm a, Chairman Pu CL Ruala, MP Lok Sabha leh Co-Chairman Pu Ronald Sapa Tlau, MP Rajya Sabha ten an kaihruai.

Thusawiin Pu CL Ruala chuan, member kal khawmte chu sawrkarin a mipuite dawmkan a tumna sum leh pai a taka lo hmanga enkawl zuitute an nih avangin anni bak sawrkarin innghahna dang a neilo a ni, a ti a. Vigilance Meeting chu ngaihpawimawh hle tura hrilhin Central sawrkar lamin he meeting hi a ngai pawimawh em em a, member kal dan thlengin an lo enchik peih thin a ni, a ti. Meeting report pawhin a hun takah Delhi a thlen a tul a, chutiang a nih loh chuan Fund release thlengin kan tawrh phah thei a ni, a ti. Kangmei laka Mizoram humhim a tul tak zet thu sawiin Pu C.L Ruala chuan, kan ram hi thlaler rim namah kan chhuah mai ang tih a hlauhawm tawh a, kan nunna hi kan ramngaw te nen a inzawm tlat a ni tih hi i hre thar theuh ang u, tiin member kalkhawmte a chah a ni. Meeting neih inkar chhunga hmasawnna hna thawh report tam tak ngaihthlak tur a awm thin chu lawmawm a tih thu a tarlanga, hnathawktute chungah lawmthu sawiin kumthar chibai a buk nghal a ni.

Co-Chairman Pu Ronald Sapa Tlau pawhin thusawiin, sawrkar hna atanga kan hahchawlh hnu pawha kan thinlung tilawm veng vengtu tur hnathawh tha neih tum theuh turin member te a sawm a, member ten hna an thawh that chuan Mizoram chuan hna a thawk tha a ni mai a, kan kutah hian kan ram hmelhmang leh kan hma lam hun chu a innghat tlat a ni, tiin kalkhawmte a fuih a ni.

He Meeting ah hian nikum October thlaa Vigilance & Monitoring Committee thut leh tun February ni 15 inkara District chhunga hmasawnna hnathawh hrang hrangte thlirlet a ni a, he hun chhung hian MGNREGS atangin Rs 1714.24 lakh hmuh niin ni 25 inhlawhna siam a ni a, mirethei in sakna IAY sum in 95 sakna tur hmuh a nih bakah IAY dawng tur hiah Waiting List nghet (Permanent Waiting List) buatsaih a ni bawk. IWMP ah hian Lawngtlai District chhungah Project 17 kalpui mek a ni a, amaherawh chu tun reporting period chhung hian sum hmuh a ni rih lo thung. Backward Region Grant Fund (BRGF) atangin Rs 1171 Lakhs hmuh a ni a, heng sumte hi District chhunga hna chi hrang hrang 238 zet thawh nana hman a ni.

Swachh Bharat Missions Gramin (Rural) hmalakna atangin December 2015 thleng khan mimal ekin 275 sak hman a ni a, tunah hian he hna hi chhunzawm mek a ni. Tin, National Rural Drinking Water Progrmamme atangin Lunghauka khaw tan tuilakna Rs 90.03 lakhs senna tur chu thawh mek a ni a, reporting period chhung hian Rs 29.23 Lakh hmuh a ni bawk.

He meetingah hian District Level Vigilance & Monitoring Member Secretary, Pu J. Hmingthanmawia, Lawngtlai Bawrhsap bakah Department hrang hranga District Officers te, LADC aiawh EM leh official te, tlawmngaipawl hruaitute leh member dangte an tel a ni.