Vawiin khan Seling YMA Runah Thingsulthliah Area Mizoram Upa Pawl Conference vawi 30-na chu hman a ni a. Home Minister Pu R. Lalzirliana chuan khuallian niin a hmanpui, MUP General Headquarters atangin President Pu R.K. Thanga leh Secretary, Pu Sainghinga Sailo-te pawhin Conference hi an hmanpui bawk.

Khuallian, Home Minister Pu R. Lalzirliana chuan upate chu min uaptu leh min thlamuantu an ni tih sawiin “Upaten min uap loh chuan a zam awm hial thin” a ti a. Nun thlahdah avanga nunna chan thalaite zingah an tam tawh thu sawiin Minister chuan “Thalaite thihna hian thin a thawng zo tawh meuh lova; kum upate thihna zawk erawh chuan min thawngin min tithlaphang thin a ni,” a ti bawk. Minister chuan a bial mipuite chu NLUP hmalaknate hmang tangkai turin a fuih a, he hun tha bawh pelhtute chu ramin a la than san hial a rin thu a sawi bawk. Mizoramah remna leh muanna vawn him a tul thu pawh tarlangin sawrkar chuan a tih tur chu huaisen takin a ti thin dawn a ni, a ti a. Kaladan Multi Modal Transit Transport Project (KMMTTP) hnathawh chu chak taka kalpui a ni tih sawiin, “Mizoram chu reiloteah India khawchhaklam kawtchhuah a ni dawn a ni,” a ti bawk. Minister hian Seling MUP Building sak nan cheng nuai thum a pe nghal bawk.

Khualzahawm, MUP General Headquarters President Pu R.K. Thanga pawhin thu sawiin MUP member-te chu thalaite kawng dik leh nundan tha kawhhmuhtu ni tura tan la sauh sauh turin a fuih a. Mizo tawng dik hmang uar tura sawmin MUP member-te chu Mizo tawng hman dan dik zirtirtu leh a humhalhtu ni theuh turin a sawm a. MUP General Headquarters in MUP member-te hamthatna tura a hmalakna hrang hrangte a tarlang bawk.

Thingsulthliah area-ah hian MUP Unit pasarih an awm a. Conference hi Thingsulthliah Area MUP President Pu K. Thankima’n a kaihruai a. MUP unit hrang hrangten lengkhawm zaia intihsiakna neiin tlaiah zanriah an kil ho nghal a ni.