Vawiin khan I&PR Conference Hall-ah JERC (Manipur & Mizoram) hnena P&E Department-in kum 2016-17 atan a tariff tih san an dilna chungchangah public hearing neih a ni.

Public hearing ah hian P&E Department chuan tariff tihsan an dilna sawifiahin, tihsan tumna hi chawhrualin za zelah 8.21% a ni an ti a. Tariff tih san a nih hnu hian unit khat zelah pawisa 33 in a sang dawn a ni.

P&E Department chuan an dilna anga tariff tihsan a nih chuan kum 2016-17 chhungin consumer te hnen atanga power hralhna revenue hi vaibelchhia 166.18 hmuh theih an in ring a. Kum 2015-16 aia an hmuh san na tur chu vaibelchhia 12.47 a ni dawn a ni. P&E Department sawi danin power pek nana kum 2016-17 chhunga sum ngai zat Aggregate Revenue Requirement (ARR) cheng vaibelchhe 252.93 hmu let tur chuan unit khat man hi cheng 2.21 vel zelin tihsan a ngai a, hetianga tihsan a nih dawn chuan consumer tan phur rit a ni thei a, chuvang chuan unit khatah pawisa 33 ang zel a tihsan tum a ni. Tariff tihsan a ni chung pawh hian cheng vaibelchhhe 84.75 laiin ARR a la pha dawn lova, hei hi sawrkarin a pek sak a tul dawn a ni. An beisei dan chuan consumer-te hman bak NERLDC kal tlang a State dangin an hman atangin cheng vaibelchhe 2.34 vel revenue hmuh beisei a ni a. State sawrkar chuan ARR a phak lohna cheng vaibelchhe 82.41 chu mipui tan subsidy in a pek sak turah ngaiin tariff tihsanna tur chu 8.21% a ni.

Public hearing ah hian Mizoram Consumer Union (MCU) in domestic bika tihsan an rawtna te ngaihthlak a ni a. Mi pawimawh thenkhat ten tariff tih sanin P&E Department leh mipui nawlpui a nghawng theih dan an sawi ho bawk.

Public hearing hi Chief (Engineering), JERC (M&M) Pu Lalchharliana Pachuau in a kaihruai a. P&E Department hotute bakah MCU, CYMA, MHIP, MUP leh Mizoram Chamber of Commerce & Industries Gen. Hqtrs te awiawh an tel a ni.