Vawiin khan District Level Fire Prevention Committee, Kolasib huaihawtin Kawnpui a Awithangpa Hall-ah kangmei lakah invenna chungchangah Fire Prevention Campaign hun buatsaih a ni a. He hunah hian Pu Hmingdailova Khiangte Parliamentary Secretary chu khuallian niin a hmanpui a. Dr Arun T, IAS SDO(C) Kawnpui leh Pu Saurabh Sharma, IFS DFO Kolasib ten an tawiawm a ni.

Pu H Lalmuanpuia, Chhuahtlang Daily News Paper, Editor kaihhruaiah hian thusawiin Pu Hmingdailova Khiangte chuan Hmarchhak State dangte aiin Mizoram chuan ram kan tikang nasa a, mithiamte chhut danin Mizoram hmun 6 a thena hmun khat 1 vel hi kan ti kang thin nia chhut a ni, a ti a. Ram tikangtu chu ram hmelma an ni a, mipui pawikhawihtu an ni bawk a, Kan eizawnna Huan thlai min tih kan sak pawhin kan rilru a na ngawih ngawih thin a ni tiin Kangmei laka fimkhur hi kan sawi tam a ngai a ni, a ti bawk. He hunah hian mipui kalkhawmte chu an awmna apiangah ram tih kan that loh zia leh a nghawng te sawi chhawng zel turin a chah a ni.

Kawnpui Range Officer in report a pek danin kum kalta 2015 ah khan Kolasib District a ram kang zawng zawng hi 413 hectare a ni a; chung zingah chuan 388 hectare zeta zau chu Lo hal vanga kang a ni a. Kawnpui range huam chhunga ram kang 6.9 hectare-ah hian Lo hal vanga kang chu 6 hectare a ni a ti bawk. Forest RO chuan sawrkar in Lo hal hun tur a siam chu mipui ten zawm tur leh Thlawhna thlawk tibuai phak khua te pawhin sawrkar thu ang chiaha Lo hal turin a hrilh nawn leh a ni.

Vawiin Campaign-ah hian DFO Kolasib leh SDO(C) Kawnpui ten thu an sawi bawk a. Sawrkar Pisa hrang hrang aiawh te; NGO hruaitu leh VC te bakah zirlai sawm bik ten he hun hi an hmang a ni.