Vawiin khan Lunglei-ah District Disaster Management Authority Chairman Lunglei DC Pu Abhijit Vijay Chaudhari hovin chhiatrup thlen thuta inrin dan tur leh chhanchhuahna hna thawh dan tur 'Training for District Response System (IRS) Team' chu DC Conference Hall-ah neih a ni.

Training hawnnaah thusawiin Lunglei DC Pu Abhijit Chaudhari chuan Mizoram hmun tinah chhiatrup thleng tura laka invendan dan leh chhanchhuahna chungchanga inzirtirna leh training hi a pawimawh em em a; Lunglei-a training leh mock-drill neih tawh thinah DM&R hotuten attendance a that vak loh thu a hnenah an thlen thu sawiin Pu Abhijit Chaudhuri chuan Disater Management hi ngai pawimawh theuh tur leh mahni chanvo tha taka hlen turin member-te a hrilh. Tun thla February ni 22 & 23 khian disaster Managment chungchang training chi hrang hrang buatsaih chho a nih tur thu leh February ni 24-ah 'Mega Mock-Drill' buatsaih a nih tur thu a sawi a, hei hi pawn lam atangin Disaster Management lama mithiamte leh Observer te pawhin an chhim dawn a ni, a ti.

Lunglei District Organiser, DM&R Pu Lungduhsanga chuan Lunglei District Disaster Management Plan chungchang sawizauvin Department zawng zawngin Disaster Management Plan siam vek tur an nih thu a tarlang a. District Organiser Pu Zothansanga Hmar chuan Lunglei-a 'Mega Mock Drill' tihchhin hunah lirnghing awm thut pawha Lunglei khawpui hmun 4 - Serkawn (road blockade); Govt JB College, Bazar Veng (collapse); Saikuti Hall, Venglai (collapse & fire) leh Lunglei Supermarket / Sobji Bazar (collapse) - ah te invenna leh chhanchhuahna hna thawh dan tur enchhin a ni dawn tih a sawi a. Heng hmun 4 atan Staging Area leh Makeshift Hospital-te ruat a ni bawk ang a; Search & Rescue Operation ti turin Disaster Management Force leh Adventure Club trained chhuak tawh te ruat an ni ang a; Police, MPRO leh Fire Services te chanvo pawh ruat a nih dan tur a sawifiah a. District Incident Response Team te chu an hotu Deputy Commissioner hovin DC Conference Hall-ah 'Command Position' kengkawhin chhiatrupna thlen thuta hmalak dan tur an rawn rel dawn a ni.

DM&R tarlan dan chuan eng hunah pawh chhiatrupna eng pawh thleng se, mipuiten heng a hnuaia phone number-ah te hian a rang theih ang berin District hotute an rawn hrilh nghal tur a ni :

100 – Police Station.

101 – Fire

1077 / 2323635 – Emergency Operation Centre

2325071/ 2324555-Civil Hospital, Lunglei