Home Minister Pu R. Lalzirliana chuan “thalaiten ram leh hnam an humhalh theih dan tha ber chu thiamna a ni a; state ralmuang leh zalen taka kan awm hi nuam tawl leh awm awl phahna tur nilovin, taimakna nen hma kan sawn phah zawk tur a ni, a ti. He thu hi vawiina Mizoram Students’ Union (MSU) General Conference vawi 16-na, Sialhawka neih a hmanpui naah a sawi a ni. Home Minister hi Pu Lalrinmawia Ralte, Political Advisor to CM leh Pu H. Zothangliana, MLA ten an tawiawm a. He Conference-ah hian Pu Lalrinliana Sailo, Tuichang Bialtu MLA chu Uaptu a ni. 

Minister Pu R. Lalzirliana chuan thalaite chu nakin lawka ram hruaitu tur an nih thu hi vawi tam tak sawi tawh thin niin, heihi sawi satliah mai nilo  thil pawimawh tak a ni tiin, thalaite chu mahni zirlai ah theihtawp chhuah a mahni inrintawkna nen ram tana mi tangkai nih tum vek tura a duh thu a sawi a. Chhungte thawhchhuah ring ringawt a nuamsa tak leh awl taka awm chu ram hmasawnna daltu a nih thu sawiin, mahni theih chin chinah thahnem ngai taka zir a thawk turin Home Minister chuan thalaite chu a sawm a. Mizo nun zemawi chhawm nung zel tura a duh thu sawi telin, aia upa zah leh nu leh pa te chawimawi thiam chu hlawhtlinna bul a nih thu a sawi bawk. 

Vawiin MSU General Conference-a khualzahawm Pu Robert Romawia Royte, Chief Managing Director, NECS pawhin thu sawiin, thalaite zingah a chhe lam leh beidawng zawng ni lova, a eng lama thil thlir mi leh mi thil tha duh awm tam se a tih thu leh chung mite atang chuan thil tha a chhuah thin thu a sawi a ni. 

Mizoram Students’ Union (MSU) General Conference vawi 16-na hi 11.10.2017 khan neih tan a ni.