Law & Judicial Minister Pu Lalsawta chuan Dan hriatloh hi chhuanlam a tlin loh avangin mahni dikna hre tur leh midangte dikna palzut lo turin mipuite tan dan hriat a pawimawh, a ti a.  He thu hi vawiina Aijal Club-a Central Young Mizo Association (CYMA) leh Law& Judicial Department buatsaih lehkhabu “Bengvarna Vol-II” a tlangzarhnaa a sawi a ni. 

Law & Judicial Minister chuan Bengvarna Vol-I lehkhabu tangkai tak chhuah anih hnuin Bengvarna Vol-II chhuah ani leh thei chu lawmawm a tih thu a sawi a. A buaipuitu an pawimawh thu sawiin CYMA in buaipui tlaka a ngaih chu mipui pawhin an ngaihlu a ni, a ti a. Pu Lalsawta chuan dan chu a than reng avangin a thar hriatbelh zel a ngaih thu leh hemi anih avang hian dan thar hriatbelh zel tura dan lehkhabu te chhiar tam a tul thu a sawi a. Law & Judicial Minister chuan YMA chu Mizoram tinuamtu anni tiin an hmalaknate faka, hemi rual hian India khua leh tui kan nih angin eng ‘issue’ ah pawh  India Danpui (Constitution) mila kal zel a pawimawh thu a sawi bawk a ni. 

Tlangzarh inkhawm hi Pu Jeffrey L. Fanai, Chairman, Legal Sub- Committee, CYMA chuan a kaihruai a, Pu Lalhmachhuana Gen Secy CYMA chuan thusawiin Pu MC Siamkunga Secretary, Legal Sub-Committee, CYMA chuan report a pe bawk a ni. 

Bengvarna Vol II hi CYMA leh Law & Judicial Department tangkawpin an buatsaih niin Dan lam lehkhabu a ni a. Kum 2012 khan Bengvarna Vol-I lo chhuah tawh a ni bawk. Mizorama YMA Branch 805 hnenah bu khat theuh a thlawnin pek a ni dawn a ni.