Vawiin 11.11.2011 chawhma dar 11 khan Ruallung - Rulchawm khawchhuak Welfare Committee, Aizawl, buatsaihin Ruallung khuaa Lal Mual-ah Thalfavang Kut ni 2 na hman a ni a; I & PR Minister Pu Zodintluanga chuan he ni hi a hmanpui a ni.

Pu Zodintluanga chuan, “Mizo Hnam hi chimral hlauhawm dinhmunah a ding niin kan sawi thin a; kan hnamzia rang leh pipu chena kan hnam nunphung leh zemawite  kan humhalh a, kan chawisan deuh deuh chuan Mizo hnam hi hnam ziding nghet tak kan ni reng thei ang. Chuvang chuan kan tu leh faten kan hnam ziarang an hluta, an vawnnun reng theih nan Kutpui kan hmang thin hi thil tangkai tak a ni” a ti. Mizo thalaite zingah mahni intodelh lo leh hnathawh lama zawmthaw tak tak an tam ta lutuk chu ngaihmawhawm a tih thu Pu Zodintluanga chuan sawilangin, “Thalaite zingah nun dawngdah leh hnathawk peih lo, chawm leh enkawl hautak em em si kan tam ta hle a. Chuvang chuan Mizo thalaiten kan nun kan inenlet a hun takmeuh a; taimakna, tumruhna leh mahni inthunun theihna nena khawvel kan hmachhawn a tul a ni. Hei hi ram leh hnam humhalhna kawnga hmanraw pawimawh ber pakhat a ni” a ti. Mizoram-ah mirethei leh mihausa inkar a zau nia sawi thin pawh a ti bo turin mitinin mawhphurhna kan neih thu Minister chuan sawiin, “Sorkar-in kut hnathawktute dinchhuah nan NLUP a ruahman a. He ruahmanna pawh hi mitaimate leh  mitumruhte tan chuan chhungkaw dinchhuahna rahbi pawimawh tak a ni; Mi dawngdahte leh mi thatchhiate tan erawh chuan nakina mihausa leh mirethei inkar siamtu a ni thei bawk. Chuvangin keimahni kut kawih emaw, sorkar ruahmanna emaw pawh nise hlawhtling tur chuan a pawimawh ber chu rinawm tak leh taima taka engkim tih hi a ni” a ti.

Vawiina Ruallung khuaa Thalfavang Kut ah hian Ruallung leh Rulchawm khua 2 te chuan Mizo Hnam zia leh lam chi hrang hrang an entir a; Aizawl atanga zaithiam kalten mipuite an awi a. Tlaiah he khaw pahnih huapin ruai buatsaih a ni a; zanah concert buatsaihin Thalfavang Kut hi khar a ni ta a ni.