Mizoram Police chuan Mizoramah remna leh muanna a awm chhunzawm zel na tur te leh inthlanpui Mizoramin a hmachhawn mek chu tluang taka neih a ni theihnan a hnuaia mi ang hian mipui hnenah ngenna a siam.

Kan hriat theuh angin kan tunlai boruak leh dinhmun ah hian Mizoram mipui ten harhfim taka engkim Dan ang zel a kan tih a kan kalpui angai ani tih hre thar leh ila. Kan ram tana thalo tur emaw Sorkar leh mipuite hmingchhiat theihna kawng hrang hrang ah fimkhur tlang turin kan in  ngen nawn leh a ni. Abikin chi leh chi inkara inhmuh thiamlohna thlen thei leh tharum thawhna lam hawi thu leh hla te. Social Media kal tlanga vawrh darh loh hram tum theuh ila, thu dik leh diklo pawh chian hmasa lova hnam leh hnam inkara inhmuhmawhna thlen thei thu leh hla tumahin vawrhdarh lo turin kan in ngen nawn leh ani.

Kan rama hnam hrang hrang heng Mizo, Vai, Bru, Chakma, etc. India khua leh tui diktak te chu thlamuang taka kan khawsakho dial dial theih nan tumahin harsatna siam lo tur leh a hnua kan inchhir lehna tur a hma la lo turin leh rilru fim tak pu vek turin kan in ngen nawn leh a ni. Hnam hrang hrangte India khua leh tui diktak te chu thlamuang taka kan chen za ho theih nan leh kan hma lawka Inthlanpui hlawhtling tak kan neih theih nan te kan tanrual thap angai ani. Hemi kawnga hma la theuh turin Mizoram Police chuan mitin te kan ngen ani.