Vawiin hian Pu Lalruatkima, Minister of State for Information & Public Relations, Rural Development, etc., chuan MHIP Serchhip Sub-Headquarters ten MHIP Day vawi 45 na, Chhiahtlang Ramlai Community Hall-a an hmannaah khuallian niin a telpui a. Vawiina kan ram kan hnamin harsatna a tawh tam tak hi chu chhungkua atanga chin fela siamthat theih a nih thu a sawi. He hunah hian Pu C. Lalramzauva, Sr. Advocate, Adviser to Chief Minister chu khualzahawm a ni.

Minister chuan, Mizoram rohlu kan tlawmngaipawl lian pathum zinga pakhat MHIP te chanchin duhawm lo ri tunhnaiah kan han hre thin hi hrehawh ka ti a. Vawiin MHIP Day vawi 45 na a lo thlen hian damna lo thleng se la, kan hnam innghahna tlawmngaipawl Lungthu pathum zinga Lung khat, kan Hnam hruihrual thum zinga hrui khat hi a keha, a chah i phal lovang u. Hlaphuah thiam Pu Laltanpuia’n “Lungrualna hi ram leh hnam tan, himna kulhpui ber a lo ni” a tih kan thinlungah lo thar leh se ka duh a ni, a ti a. Ram hmasawnna hi chhungkua atanga tan a ngai a, chu chhungkaw vengtu chu Nu an nih avangin nu te hi mahni chhungkaw kaltlanga ram vawngtu vek in ni, tiin nu pawimawhzia a hrilh a. Vawiina Mizoramin harsatna a tawh tam tak leh a hnam anga natna kan tawh mek tam tak te hi chhungkua atanga tihdam theih an ni a, chhungkaw enkawltu hian chu chu hriain mahni zawnah theuh theihtawp i chhuah ang u, tiin a ngen a ni. Pu Lalruatkima hian, vawiina kan hnamin natna a tawrh tam tak te hi Moral Reformation hmanga tihdam a ngai a, aia upate zahna a bova, mahni hnamzia leh hnam nun ngaihhlutna a bova, ruihhlo leh thil thalo dang ngawlvei kan pung zel a, zuk leh hmuam kan tih nasat avangin kan hriselna chhuhin kan awm a, kan damrei lova, kan hnam hian natna a vei mek a ni. Heng natna te tidam tur hian kan ngaihhlut zawng kan thlaka, kan sukthlek hi tihdanglam a tul a, nu leh paten fate kawng dik kan kawhhmuha, keimahni ngei pawh entawn tlaka kan nun a ngai ni, a ti. Mitin mahni hriselna ngaihlu tura chahin sawrkarin Health Care Scheme tha tak a siam mek thu leh hemi atana MLA zawng zawng ten an hlawh 1% kan dah vek tur thu a sawi a, MHIP Sub Headquarters hi thilpek a pe bawk a ni.

He hunah hian Khualzahawm Pu C. Lalramzauva, Sr. Advocate, Adviser to Chief Minister pawhin thusawiin,  tunhma kan pi leh pute nun dan ngaihtuah chuan vawiina hmeichhiate dinhmun hi a sangin  a tha hle mai a. An theihna a sangin an tumna lamah an inpekna a sang thin a, mipaten kan tluk lohna a tam tawh hle a ni, a ti a. Hei hi ram leh hnam hmasawnna rah a nih thu a sawi a ni. Khualzahawm hian, kan ram hi HIV natna in a run mek tih sawiin nun thianghlim leh him nei tura mitin kan fimkhur a tul hle tih a sawi a, zuk leh hmuam leh thil dang kan taksa tana thalo kan tih nasat avanga kan hloh hi a tam em em a ni, tiin nun uluk zual turin MHIP member kalkhawmte a fuih a ni.

Vawiin a MHIP Day vawi 45 na lawmna inkhawm hi an President Pi Sanghmingliani’n a kaihruaia,  Secretary Pi Lalhmunsangi’n report pein Serchhip Sub-Hquarters chhungah Block pathum, Joint 4 leh Branch 72 an awm a. Kum kal ta chhungin an member 41 an boral a ni.

Intihhlimna hun te hmangin, tlai lamah ruai an theh nghal a ni.

Attachment

  • Loading attachment...