Chief Minister Pu Zoramthanga chuan vawiin khan Mizo Hmeichhe Insuihkhawm Pawl Zemabawk Branch ten MHIP Day vawi 45-na an lawmnaah khuallian niin Zemabawk YMA Hall-ah hun a hmanpui.

Chief Minister chuan kalkhawmte chu MHIP Day chibai bukin, chhungkua leh khawtlang nun a hmeichhia an pawimawh thu a sawi a. Chhungkaw tinuamtu ber an nih thu te, an tawngkachhuak leh midangte nen an indawr danah thui takin hlimna leh hlim lohna thlen theitu an nih zia hre reng turin a chah. Chief Minister chuan tunlaiah zu leh ruihhlo in chhungkaw tam takah harsatna a thlen thin thu sawiin, chutianga buai chhungkua te chuan Pathiana beiseina nghat tlat thin tura chah in, sawrkar pawhin ruihtheihthil avanga buai, dam duh te enkawlna tur siamin hma a lak mek thu a sawi. Pu Zoramthanga chuan MHIP Day hmang tura kalkhawmte chu hriselna ngaipawimawh tura chah bawkin, vaihlo leh a kaihhnawih thil ten mihring taksa chhung a tihchhiat theih dan te sawiin, heng sahdah, tuibur leh adangte laka fihlim turin leh midang pawh hrilhhre turin a chah a ni.

He huna khualzahawm Dr. R.K. Lallianthanga, Chief Scientific Officer pawhin thu sawiin, science khawvela thil pawimawh hrang hrang hmuchhuaktu leh siamchhuaktute zingah hmeichhe langsar tak tak an lo awm tawh thin thu sawiin, science chu eizawnna tha tak siamtu a nih thu, leh hmeichhiate zinga science lama tuina leh hmasawnna siam tura hma lak chhunzawm zel ni se a ti a ni.

Vawiin MHIP Day lawmnaah hian Zemabawk MHIP Branch te chuan vengchhunga vohbikte leh kum 70 chunglamte hnenah thilpek hlanna hun siamin, Chief Minister chuan heng thilpekte hi a hlan a. Chief Minister hnenah hian Zemabawk branch MHIP te hian CM Relief Fund a chhunluh turin cheng 5000 an hlan bawk a ni.

Vawiin inkhawm hi Pi Vanlalauvi, an president chuan inkhawm hi kaihruaiin secretary Pi Zanguri hnen atangin report ngaihthlak a ni a; Zemabawk Local Council chairman hnen atangin thusawi ngaihthlak a nih bakah an member thi te sunna leh ralna hun hman a ni bawk.