Nimin khan Lunglei District Research Office, Economics & Statistics Department buatsaih ‘Statistical Handbook Lunglei 2018’ tlangzarhna hun DRO Office Lungleiah hman a ni.

‘Statistical Handbook Lunglei 2018’ tlangzarhtu Lunglei DIPRO Pi C. Lalremruati chuan thu sawiin Statistic kimchang siam chu thil namai lo tak a nih avangin thawktute chhelna leh taihmakna chu fakawm a tih thu a sawi a, ram hmasawnna hna thawh kawngah pawh Statistical Handbook chu a pawimawh hmasa ber tur a nih thu leh sawrkar hnathawk leh pawl hrang hrang tan pawh an hnathawhna kawnga rawn hlawh ber tur, District Chhunga chanchin kim chang ziakna a nih avangin lehkhabu dang aia a hlut bik thu a sawi a ni.

Lunglei MJA President Pu H. Lalthansanga pawhin thu sawiin District Statistical data kimchang ziaka awm chu chanchinbu mi leh chanchin thar buatsaihtute tan a tangkai bik zia a sawi bawk a ni.

Lehkhabu tlangzarhna inkhawm hi Lunglei DRO Pu TC Zonunsangan kaihruaiin sawrkar hnathawkte leh MJA te bakah sawm bik mi engemawzat an tel a ni. Inkhawm zawhah hian inkawmhona hun neih niin District Research Office, Economics & Statistics Department hnuaia branch hrang hrang – Registration of Birth & Death, National Sample Survey leh Technical Wing ten an hnathawh tlangpui leh hmalakna an neihte sawifiahna hun an hmang a ni.

Statistical Handbook 2018 Lunglei District tlangzarh takin a tarlan danin Lunglei khawpui chhung Town Area huam chhung veng hrang hrang 23-ah mihring  60,847 cheng an awm mek a, Chanmari-ah mihring tam berin mi 5318 an awm a, Bazar vengin dawtin mi 5237 an cheng a, pathumna Ramthar-ah mi 5107 an awm thung.

Kum 2017 chhung khan Lunglei District huam chhungah naupiang 3,107 awmin mipa 1,517 leh hmeichhia 1,590 an piang a ni. Hmeichhe piang an tam zawk laiin thihna lamah erawh chuan mipa 506 thi an awm laiin hmeichhia 304 an thi ve thung.

Lunglei District huam chhungah Ration card nei AAY (Chhungkua) 4074, PHH (Chhungkua) - 21152, NFSA (Chhungkua) - 18755 an awm bawk. Primary School 461, Middle School 282,  High School 118, Higher Secondary School 32 leh College 5 a awm mek bawk.