Mizo tlangval, ram tana nun hlantu Hav. Lalrohlua, S/o Malsawma, Kelkang (Champhai Dist) leh L/Nk J. Lalrinngheta S/o J. Thanthuama, Tuidam (Mamit Dist.) te ruang chu vawiin khan Mizoram a rawn thleng a; an Regiment 35 Rashtriya Rifles atangin Charlie Company II-IC P.S.Mangpu leh Nb/Sub. J.L.Zuala ten an ruang an rawn zui an ni. Lengpui Airport-ah sipai chawimawina famkim hlan an nih bakah state sorkar buatsaihin anmahni chawimawina leh thlahna inkhawm hman a ni. He hunah hian Mizoram Chief Minister Pu Lal Thanhawla leh sorkar mi pawimawh engemawzatin chawimawina pangpar an hlan a ni.

Vawiina Mizo sipai pahnihte ruang hmuahna leh thlahna inkhawm Airport Chaplain Maj.C.Thanhranga kaihhruaiah Mizoram Chief Minister chuan ram leh hnam tana nunna chante chu Mizote tihmingthatu an ni a, Mizo zawng zawngin kan chhuangin kan ui tak zet a ni, a ti. Kristian kan nih angin Pathian thlamuanna leh awmpuina kan hnenah a awm reng a ni tih hre reng turin sipai boral ta te chhungkua leh laina hnai kalkhawm te a chah a ni. Thlahna inkhawmah hian CYMA aiawhin Vice-President Pu Lalbiakzuala bakah Hav. Lalrohlua pa Pu Malsawma, Kelkang leh L/Nk J.Lalrinngheta nu Pi J.Lalmuanpuii, Tuidam ten thu an sawi bawk a ni.

Hav. Lalrohlua leh L/Nk J.Lalrinngheta te thlahna inkhawmah hian Chief Minister bakah Health Minister Pu Lalrinliana Sailo, Transport Minister Pu P.C.Zoramsangliana , AH&Vety Minister Pu N.K. Chakma, Dy. Speaker Pu John Rotluangliana, Dy. Chief Whip Pu R.L.Pianmawia, Parliamentary Secretary Col.Z.S.Zuala, Lunglei High Power Committee Vice-Chairman Pu Joseph Lalhimpuia, Mizoram Youth Commission Chairman Pu Hmingdailova Khiangte leh KVIC Chairman Pu K.Lianzuala leh Chief Secretary Pi L.Tochhong ten chawimawina pangpar an hlan a ni. Anni bakah hian GOC 3 Corps, GOC 41 Sub Area, GOC 57 Mtn. Divn., 1st & 5th Assam Regiment, 35 Rashtriya Rifles, Mizoram Ex-Services League Association, Commandant General & Staff Mizoram Home Guards, Director & Staff Sainik Welfare & Settlement, 26 Assam Rifles, BJP Mizoram Pradesh leh Central YMA aiawhin chawimawina pangpar pek a ni bawk.

Hunserh leh chawimawina pangpar hlanna hun hman zawhah Hav. Lalrohlua leh L/Nk J.Lalrinngheta te ruang hi an khaw lam ve ve panpui nghal a ni.

Tunkar Thawhhtanni, June ni 24-a Kashmir Valley, Srinagar daifema Hizbul Mujahideen helho ten an lambunna-a 35 Rashtriya Rifles pariat thi zingah Hav. Lalrohlua leh L/Nk J.Lalrinngheta te hi an tel a. Sipai dang 16 hliam zingah Nk. David Lalduhawma, ITI Veng, Aizawl leh Nk. Lalrimawia te an tel bawk a, ngaihtuahawm erawh an ni lo ni a thu dawn a ni.