Ramhlun Indoor Stadium tia hriat thin Ropuiliani Indoor Stadium tia thlak tum a nih chhan Sports Minister Pu Zodintluanga chuan Ramhlun veng hrang hrang hruaitute vawiin khan a hrilhfiah a, Sports Minister chuan he Stadium hi Sorkar hmasa in a lo hluihlawn tawh, sum tam tak bo tawhna a nih bakah CAG Report ah pawh tarlan a nih avangin, a hming ngai, Ramhlun Indoor Stadium hman zui a nih chuan Audit hunah Sorkarin harsatna a tawk thei dawnin a lang a, hei vang hian Ropuiliani Indoor Stadium ti-a thlak chu Sorkar tan a him a hriat a nih avangin phuah chhin phawt a ni, a ti.

Vawiina sawihonaah hian Ramhlun veng hrang hrang aiawhte chuan Ramhlun Indoor Stadium tih chu putzui tir phawt nise tih rawtin, Audit hunah Sorkarin harsatna a tawk ta a nih chuan khawtlang mipuite pawhin an hriatthiampui an rin thu Sports Minister hi an hrilh a. Hemi ang hian Ramhlun Veng Indoor Stadium tia thlak leh phawt nise tiin thutlukna an siam a ni. Ramhlun Veng khawtlang aiawh te hian Sports Minister hmalaknaa an venga hall tha tak din a nih leh ta hi lawmthu an sawi bawk a ni.

He Indoor Stadium hi bul tan uk tawh, zawhfel lova kum tam tak dah a nih avangin chhutchhiat vek a ni a, khawtlang mipuite ngenna avangin sorkar chuan cheng nuai 234 sengin kum 2011 atang khan a thar thawh leh a, tunah hian a sak hna hi zo felin August thla chawhnu lam hian hawn tum a ni.