Vawiin chawhma ah khan Governor Lt.Gen(Rtd.) Nirbhay Sharma chuan Mizoram University Guest House’s Conference Hall ah “ National Symposium on Ethnobotanical Importance in North-East India” a hawng a. He zirhona ah hian pi leh pu ten ramhmul damdawi an hriat chinchang thang thar te an thurochhiah chhawn thin chung chang Science behchhana zirchiang in hmarchhak bial chhunga cheng te tana a pawimawhna te sawiho a ni.

Symposium hawngtu Governor Lt.Gen(rtd.) Nirbhay Sharma chuan MZU hmalakna fakin Mizoram tan thluakbur a nih angin a thiamna leh theihna te chu Library ah dahtha mai lova Mizoram pum leh pawnlam thlenga hmasawn pui na atan a pen chhuahpui turin MZU mithiam te a chah a ni. A sawi zelna ah science thiamna hmanga ramhmul damdawi hlawkpui ber chu China a ni a, an ni khian India aiin ramhmul damdawi an neih tam zawk vanga hlawhtling zawk an ni lova. An neih chhun te a tangkai taka an hman vang zawk a nih a rinawm thu a tarlang. Hmarchhak bial chu khawvela biodiversity ropui ber pakhat a nih thu sawiin heng lai hmuna ramhmul damdawi tam tak hi a rang lam zirchian a pawimawh tur thu sawiin mithiam leh zir mi te tan chona a ni a ti. Mizoram bik chungchang sawiin ram changkang te neih ang mithiam, hna chi hrang hrang thawk thei, tam tham tak a neih bakah ram leilung hauhsakna a nei tel a ni a ti a. Ram thenkhat chu ‘Human Resource’ bak an nei lo chungin an neihchhun te an hmanthiam avangin ram zawng zawng chunga leng an ni thei a, chung mi te ngaihtuah chuan Mizoram hian engkim a nei thung a, a thil neih te awmze neia remkhawm chiah hmasawnna atan a hmabak awm chhun a ni tawh ani a ti.

National Symposium on Ethnobotanical Importance in North-East India hi Department of Environment Science, MZU, Society for Ethnobotanists, NBRI Lucknow leh SOTHAM te tangkawpa buatsaih a nia, Symposium senso erawh chuNational Medicinal Plants Board, New delhi in a tum thung. Symposium hawnna Programme hi Prof.H.Lalramnghinglova in kaihruai a; he hunah hian Prof.R.Lalthantluanga, Vice Chancellor, MZU leh Dr.A.K. Goel, Senior scientist, CSIR-NBRI, Lucknow te pawn thusawina hun an hmang a. He Symposium ah hian mithiam te’n thil zirchianna behchhan in kalkhawm te hnenah zirtirna pe in symposium an zawhna neihte chhanna hun pawh hman a ni.