Vawiin chawma dar 11 kha Serchhip District chhunga Ramngaw leh nungcha humhalh dan tur leh tihhmasawnna kawnga hmalak dan tur chungchang sawiin, District Level Committee on MEFCOF chu an Chairman Dr. Lalrozama, IAS, Serchhip District Bawrhsap hovin a Chamber-ah an thukhawm a, MEFCOF (Mizoram Environment & Forest Conservative Forum) hruaituten he hun hi an hmanpui a ni.

Meeting kaihruaitu Dr. Lalrozama chuan meeting neih anih chhan sawiin, Mizoram Chief Minister hova ni 31.8.2015  MEFCOF hruaitu ten an lo rel tawh angin, NLUP hmalakna hnuaia ramngaw leh nungchate humhalh leh tihhmasawnna kawnga hmalakna bul tan nan Serchhip District chu thlan anih thu sawiin hmalakna bul tan nana thlan an ni chu lawmawm a tih a sawi.

Pu VL Bela, President, MEFCOF chuan an hnathawh dan tlangpui sawiin, MEFCOF chuan kum 2004 atang a bul tanin Mizoram chhung hmun hrang hrang an lo zirchian tawh thu leh thingphuna ramngaw siam thar lehna tur hmun te, ramsa leh sava humhalhna tur atana hmun thate an lo chhinchhiah thin thu leh ram 3500 Sq.km zet a zau chu a khaw neitu te remtihna la a “ZOTHEIHUAN” hming vuaha ramngaw siam thar lehna turin hmun 57 an ruahman fel tawh thu a sawi.

Vawiina meeting hian Serchhip District chhungah Zotheihuan a tam thei ang siam tura hmalak nise, MEFCOF Sub Headquarters Serchhip in zirchiannate lo neiin, hmalakna lo kalpui se, District Level Committee-ah an hmalakna te thlenin a tul anga bawhzui tura hmalak nise tia rel a ni.

MEFCOF hi NLUP Implementing Board hnuaiah Agency atana pawm niin, anni hian NIB ah rawtna thlenin Serchhip District atang hian hma lak tan a ni ta a, Serchhip Districta hmalakna te kalpui a nih hnuah District dangah hmalak chhunzawm zel tum a ni.