2147/2026-2027

Kolasib, 9th September, 2026: Divisional Forest Officer, Kolasib Forest Division, Pu P.C. Laltanpuia, IFS chuan a hnuaia mi ang hian Ramngaw leh Nungcha humhalhna dan bawhchhiate chunga ngaihhnathiamna lantir loh thla (Zero Tolerance Month on Forest and Wildlife Offence) chungchangah a hnuaia tarlan ang hian mipuite hriat tur pawimawh thuchhuah a siam:

Kan hriat theuh angin Kolasib Forest Division hi thing (timber) tamna hmun a ni a, dan lova thing kih, zai leh tawlh rukna pawh a awm reng tih hriat a ni a. Tin, ramsa leh savate pawh dan bawhchhiaa tihhlumte, an sa zuarte leh an taksa peng (lu, mei, hmul, adt.) kawlte pawh an awm thin tih hriat a ni bawk a.

Heng dan bawhchhiatnate titawp turin Environment, Forests & Climate Change Department, Kolasib Forest Division chuan theih tawpin hma a la reng a, amaherawhchu chhan hrang hrang avangin duh ang takin hmalakna a la hlawhtling tawk thei rih lo va. Tin, dan bawhchhia mante hi mi rethei leh khawsak harsa zawkte an lo nih fo avangin dan ang taka an chunga hmalak a harsa fo thin a, an chungah khawngaihna leh hriatthiamna lantir loh theih loh a ni fo thin. Amaherawhchu, hei hian dan bawhchhiate a tingampa zawk mah emaw tih tur a ni a, hriatthiam an nih chhan an hmang sual fo tih hriat a ni bawk a.

Hetiang a nih avang hian September, 2026 chhung hian Kolasib Forest Division huam chhungah ZERO TOLERANCE MONTH (Ramngaw leh Nungcha humhalhna dan bawhchhiate chunga ngaihhnathiamna lantir loh thla) hman a ni dawn a, hemi hun chhunga dan bawhchhiat mante chu dan ang takin an chunga hma lak a ni ang a, ngaihhnathiamna a awm tawh lovang.