Vawiin khan NLUP Implementing Board(NIB) Chairman Pu J. H. Rothuama hovin sorkar department 4 - Environment & Forest, PHE, Land Revenue & Settlement, LAD te chu NIB leh Mizoram Environment & Forest Consultative Forum(MEFCOF), Zotheihuan Society tia hriat thin, hotute nen NIB conference hall ah an thu khawm a. Ramngaw leh tuihna humhalh bakah siam belh kawnga hmalak ho dan tur an rel.

Ram leilung vawng him a, ramngaw leh tuihna te humhalh leh tipung tura sorkar department 4 ten a hrang theuhva hma an lakna bakah CYMA leh Zotheihuan te hmalakna in awmze neia hlawhtlinna nasa zawk a thlen theih nan hmun khata an hmalakna khai khawm tur Sub-Committee din nghal a ni a. Forest department bul tumna hnuaiah sub-committee ah hian heng sorkar department 4 te bakah NIB, CYMA leh MEFCOS (Zotheihuan Society)te chu member an ni ang.

He meeting ah hian sorkar department te leh MEFCOS ten hma an lo lak tawh atanga hlawhtlinna an hmuh dan te ngaihthlak a ni a. Hlawhtlinna langsar zual zingah PHE leh CYMA ten kum 2012 atanga tuihna humhalh an lo kalpuiin thingtlang khaw tam takah rah tha a chhuah dan te, Zotheihuan Society in kum 2004 atanga khaw 46 ah ramngaw humhalh an kalpuiin hlawhtlinna a thlen mek te tarlan a ni a. Tuna Sub-committee kalphung turah pawh thingtlang khaw tina mipui ten ramngaw humhalh chu sorkar tih tur ni lovin mahni ta anga ena neitu thinlung pu chunga an tel theihna turin ruahmanna siam ni se, tiin vawiina meeting chuan a rel bawk a ni.