April ni 30, 2015-a Village Council inthlan lo awm tura Serchhip District viltu “Election Observer” atana State Election Commission, Mizoram-in a ruat Pu H.L. Rochungnunga, IAS chuan Serchhip tlawhin nimin chawhnu dar 2:30 khan Serchhip DC’s Meeting Room-ah Election Officials, Party aiawhte, tlawmngai pawl aiawhte leh thuthar theh darhtute a kawm.

Election Observer chuan Serchhip District in Bawrhsap leh SP viak tha tak leh hna thiam tak an nei chu an vannei hle a ni tih sawiin, VC inthlan pawh tluang tak leh hlawhtling taka buatsaih anih ngei a beisei thu a sawi a, kumin inthlan atanga Village Council-ah hmeichhiate tan reserved seat a awm ta chu thil pawimawh tak leh lawmawm tak ani tih sawiin, sawrkar laipuiin hmeichhiate Local Bodies-a an tel hi a ngai pawimawh em em a, Village Councilah hmeichhia te an tel ve thin loh avanga sawrkar laipui atanga tanpuina awm thei tam tak kan hmuh ve theih loh thin pawh a reh tawh dawn a ni a ti bawk. Political Party leh candidate te pawh tling tura theih tawp an chhuahna kawngah tan ulh lutuk avanga mimal/khawtlang mualphona a thlen loh nan fimkhur tha a tih thu sawiin, Model Code of Conduct uluk taka zawm turin a ngen bawk a ni.

District Election Officer, Pi Juhi Mukherjee, IAS pawhin Village Council inthlan tluang taka kalpui a nih theih nan fimkhur taka hna an thawh mek thu sawiin, zanah vote chhiar a ngaih dawn avangin Polling Station zawng zawngah kawlphetha (Power Supply) pek vek tura ruahman a nih thu te, Police duty ten vote an thlak ve theih nan ruahmanna siam anih thute a sawi bawk a ni.

Assistant Election Officer Pu Lalhmansanga, MCS pawhin State Assembly Election leh MP Election-ah te EVM hman a nih hnuah VC Election atan Ballot Paper hman a ngaih leh tak avangin mi tam tak, a bik takin VC inthlana vote la thlak ngailo te tan vote thlak dan kalphungah hriatthiam a harsat theih avangin vote thlak dan dik, uluk taka mipuite zirtir tura ruahmanna siam mek a ni a ti a, Ballot Paper chhut hna pawh officer rual kaihhruaina hnuaiah uluk leh fimkhur taka kalpui anih dan tur te leh thil pawimawh VC Election atana inpuahchahna hrang hrangte a sawi fiah a ni.

Election chungchanga hriatchian duh leh zawhfiah duh nei tan Pisa kai hun chhungin Helpline No. 03838-226099 leh 03838-226105 ah te zawh fiah theih niin Election Observer pawh hi Phone No. 0389-2322872 leh 0389-2321935 ah te biak pawh theih a ni ang.

Attachment

  • Loading attachment...