Vawiina New Delhi-a rampum huap State leh UT te Power Minister intawhkhawmnaah Minister of State for Power Pu Lal Thanzara chu telin he Conference pawimawh takah hian thusawina hun a nei.

Pu Lal Thanzara chuan Sawrkar Laipui Ministry of Power in rampuma kawlphetha dinhmun, mamawhna leh harsatnate sawikhawm tura Conference a buatsaih chu lawmawm a tih thu sawiin kawlphetha siam leh semchhuahna kawnga hma chak taka lak a ni chuan hmasawnna kawng tinrengah nghawng thui tak neiin ram sumpai dihmun a siam tha thei a ni a ti.

Conference-ah hian Mizoram kawlphetha dinhmun sawiin Sawrkar Laipui power agency hrang hrang ten Mizorama power project ruahman te ti hlawhtling thei turin tun aia chak zawka hma an lak theih nan Ministry puihna a ngen. Chhimtuipui (635 MW) leh Lungreng (815 MW) project te tan DPR siam anih theih nan Myanmar Sawrkar chu chak zawka dawr nawn sak leh turin Ministry of Power a ngen bawk.

Kawlphetha semchhuah tih changtlunna leh thuamthatna tur project Mizoramin a thehluh te chu ngaihpawimawh sak turin leh a rang lama tih hlawhtlin sak turin a ngen a. Heng project te hian kawlphetha dinhmun an siamthat theih thu leh kawlphetha hloh pawh an tih tlem theih thute a sawi a ni.

Hmarchhaka kawlphetha project reng reng ramchhung hmun dang anga hrut rual a nih chuan private sector atangin ngaihvenna a hlawh lo a, chuvangin hemi chungchangah hian a bika ruahmanna siam a tul thu a sawi lang bawk