No.1389/2021-2022

Aizawl the 14th July, 2021: Ramri chungchanga political party leh tlawmngai pawl hrang hrang leh kohhrante ngaihdan thawh a sawihona hun vawiin khan Assembly Conference Hall-ah Deputy Chief Minister Pu Tawnluia kaihhruaiin neih a ni. (He meeting kotu Chief Minister Pu Zoramthanga chuan chhiat tawh avangin a telpui thei lo a ni.) 

Mizoram leh state thenawm Assam inrinna chungchang sawihonaah hian Chief Secretary Pu Lalnunmawia Chuaungo hnen atangin nikum leh tunhnaia ramri kaihhnawih a thil thlen dan te leh, Delhi-a state pahnih Chief Secretary-te inbiak dan report ngaihthlak niin, ramri chungchanga hun kalta lama hmalakna leh thu hrang hrang lo awm tawhte a sawi a. Pawl hrang hrang aiawh te hnen atangin ngaihdan ngaihthlak zui a ni a. Rawtna lut zingah Boundary committee din te, boundary commission din tura sawrkar laipui nawr te, state hnih Chief Minister-te inbe tura rawtna te, border development chungchangte, ramri a duty-te thuam that chungchang te, state châk lakna zau zawka ngaihtuah leh a dangte a tel a ni. 

Dy. Chief Minister Pu Tawnluia chuan vawiina mi sawmte atangin an ngaihdan hrang hrang sawihona hun tha tak hman a ni chu lawmawm a ti a. Rawtna hrang hrang te chu benvarthlak a tih thu sawiin, chhinchhiah vek an niin, sawrkarin hmalakna tur hmanrua tam tak a hmuh tur thu a sawi. Ramri chungchangah chuan ram neitu dik tak nihna thinlung pu chunga zavai tanrualna a pawimawh thu a sawi a. Mizoram sawrkarin a theihna leh tlinna zawng zawng nen thapui thawh mekin, a thawh zel tur thu a sawi a. Mipui tawiawmna leh finchhuahna sawrkarin a mamawh thu leh, hmalak zel dan tur pawh kil tin atanga thlir kim vek thiam a pawimawh thu a sawi a ni. 

Home Minister Pu Lalchamliana pawhin rawtna lut te chu lawmawm tiin an thahnemngaihna te chungah lawmthu a sawi a. Rilru hmunkhat pu a theihtawp chhuah ho zel theih a beisei thu a sawi. 

Vawiin meeting-ah hian Rajya Sabha MP Pu K Vanlalvena, Speaker Pu Lalrinliana Sailo, Minister of I&PR, Revenue, etc. Pu Lalruatkima, Serlui bialtu MLA Pu Lalrinsanga Ralte, Hachhek bialtu MLA Pu Lalrindika Ralte te an tel a. Addl. Chief Secretary, Inspector General of Police (Hqrs.), Secretary, Home Department leh official dangte an tel bawk. Inrawnkhawmnaa tel tur hian political party hrang hrang - BJP, INC, MNF, PC, NPP, ZNP, ZPM te bakah MKHC, NGO Co-ordination Committee-a tel pawl hrang hrang te bakah JAC on Innerline Reserve Forest atangin aiawhte an tel a ni.

Attachment

  • Loading attachment...