No.1388/2021-2022

Aizawl the 14th July, 2021 : Kumtina July ni 15-a khawvel ram hrang hranga hman thin 'World Youth Skills Day' (WYSD) chu naktuk ni.15.7.2021 (Ningani) ah hian ram hmun dangte rualin Mizoram-ah pawh Online hmangin hman a ni dawn a. He hunah hian Hon’ble Prime Minister Narendra Modi chuan thuchah a sawi dawn a ni.

Kumin a thupui atan 'Hripui hnua thalaite thiamna ngaihtuah' tih a ni a. Hripui lengin thalaite theihna, chhelna leh themthiamna a do hneh loh lawmna atan he ni hi hman tum a ni. He World Skills Day lawmna hunah hian thalaiten tun maia thiamna an chhawr tangkai tur leh nakin huna eizawnna tling thiamna an neih theih tur chungchang sawiho a ni ang.

World Youth Skills Day hi kum 2014 khan United Nations General Assembly chuan 15th July hi kumtin a hman turin alo puang tawh a ni. He World Youth Skills Day hi 'Skill India' din champha kum 6-na niin, Ministry of Skill Development & Entrepreneurship chuan he ni pual hian hmun 76-ah Jan Shikshan Sansthan (JSS) a hawn belh dawn a, JSS hmang hian skill development bulthut atanga tihhmasawn hna thawh a ni dawn a ni. Ministry of Skill Development & Entrepreneurship (MSDE) chuan JSS hnuaiah hian course 22 hmangin India ram hmun hrang hrangah zirtirna a kalpui mek a ni.

World Youth Skills Day 2021 hmanna turah hian Pu Darmendra Pradhan, Hon’ble Minister of Skill Development & Entrepreneurship chuan thu a sawi dawn a, Pu Atul. K Tiwari, Addl. Secy, MSDE chuan programme chhimtute hnenah lawmthu sawina hun a hmang dawn bawk a ni. He hunah hian Labour, Employment, Skill Development & Entrepreneurship Department, Govt of Mizoram, chuan skill development pawimawhzia hre nawn turin Mizoram mipuite, a bik takin thalaite, a chah a ni.