No.1387/2021-2022

Aizawl the 14th July, 2021 : Vawiin khan Dr. Lalhriatzuali Ralte, DC Aizawl District hovin Aizawl District chhunga Covid-19 kaihhnawih te leh hmalak dan tur sawi hona DC Conference Hall-ah neih a ni.

Pu C. Lalruaia SP, Aizawl District chuan lockdown chhunga duty thenkhat positive an awm avanga harsatna an tawh thu te tarlangin, CAB ngaih pawimawh chu mipuite tihmakmawh a nih thu a sawi a ni.

Social Welfare Department aiawh atangin centre 45 zingah centre 38 a awm zawng zawng vaccine first dose pek a nih tawh thu ngaihthlak a ni a, Aizawl District chhungah centre 4 chu tunkarah vaccine first dose an lak theih an rin thu an tarlang bawk a. PwD enkawltute hnenah pawh a rang thei angbera vaccine an lak theih nana hma la turin Health Department hnenah an thlen thu ngaihthlak a ni.

Maxi Cab Owners’ Association (MCOA)-ah member 200 vel Aizawl District chhungah an awm tih ngaihthlak a ni a, thlahnih chhung lockdown chuan an eizawnna a nghawng dante sawiho a ni a, MCOA aiawhte chuan sawrkar in an rate te ennawn leh nise an duh thu he hunah hian an thlen a.

Zoram Taxi Drivers’ Association aiawh atangin rawtna ngaihthlak a ni a, Aizawl District chhungah member 2500 vel awmin, Group A,B,C-ah inthenin karkhat chungin vawi 2 an tlan (service) mek a, group A,B,C tlan ni niloah pawh zing dar 9 hma leh tlailam dar 5 hnua tlanchhuah (service) phal nise, chu chuan lockdown chhunga an eizawnna nasa takin a puih an beisei thu leh, district danga passengers thlah phal tura ngenna he meeting-ah hian an thlen bawk a. Aizawl Two Wheeler Taxi Association leh Aizawl City Bus Owners Association aiawhte pawhin an harsatna te sawiin, DC Aizawl chuan theihtawp a chhuahpui tur thu a sawi a ni.

Mizoram University leh Mizoram College Teachers’ Association aiawh atangin lockdown laia zirlaiten harsatna an tawh te ngaihthlak leh sawiho a ni a, online class chuan result lam a nghawnglo nain, teaching quality erawh offline a phak lo tih sawiin, online exam a harsatna hrang hrang - power cut, network tha tawklo chungchangah a tul a nih chuan P& E Department leh network operators te hnena ngenna thlen rel a ni.

He hunah hian AMC, Aizawl City Local Council Association, CYMA aiawhte leh midangte an tel a ni.