Mizoram sorkar-in mi harsa zawkte in sak tanpuina Rural Housing Scheme a ruahman chu chak taka kalpui mek a ni a, vawiin khan Aizawl leh a chhehvela chhungkaw harsa thlanchhuahte hnenah Rural Development Department Godown, Zemabawk-ah GCI Sheet/rangva sem a ni. Home Minister Pu R.Lalzirliana chu Khuallian niin Dy. Speaker Pu John Rotluangliana, Law Commission Chairman Pu R.Lalrinawma leh Parliamentary Secretary Pu Lalrinmawia Ralte te chu Khual Zahawm an ni.
He rangva semna inkhawm Rural Development Addl. Secretary Pu V.Lalremthanga kaihhruaiah hian Khuallian Pu R.Lalzirliana chuan thu sawiin rambuai hunlai atangin Mizo chhungkaw tam tak chu in leh bungrua zawng zawng hlohin an awm a, chutiang rahbi tleuh tawh te chuan in tha sak lehna tur pawh an nei zo lo a ni tih hriain sorkar chuan anmahni tanpui turin he Scheme hi a duang a ni, a ti. State Plan chhungah kum 2009-2010 chhunga Rural Housing Scheme atan cheng nuai 400 dah hran a ni a, kum 2011-2012 chhunga hman leh tur chutiang zat vel bawk chu sorkarin ruahman a tum thu a sawilang bawk. Dan leh thupek kenkawh lam sawiin Home Minister chuan tunhnaia Meidum-a Contractor 2 rukbo chu sorkarin a palzam mai mai dawn lova, police ten theihtawpin an chhui mek a ni, a ti. Hetianga hna thawk duh lova, mi thawhsa ring a, midang ti ralti a, sum siam tumte chu sorkarin a ngai thei dawn lova chuvangin mi rukbo 2 te chu him tak leh pawisa pakhatmah phut lova thuneihtute hnenah hlan let leh turin Minister hian a ngen a ni.
Vawiin inkhawma Khual Zahawm Dy. Speaker Pu John Rotluangliana pawhin thu sawiin sorkarin mipuite tanpuina tur kawng hrang hrang a ruahman chungah hian mipuite chu lawm thiam turin a chah a. Mipuiten engkimah 'sorkar dik lo, sorkar chak lo' tia puh mai lovin anmahnia siamthat ngai lai awm te hmu thiama insiamthat pawh a tul ang, a ti. Mipuiin sorkar tha an duh ang bawk hian, sorkar tha nei tur chuan mipui tha neih a tul a ni, a ti.
Rural Development Department chuan Rural Housing Scheme hnuaiah a vaiin GCI Sheet 12,580 lei a ni tawh a, hengte hi chhungkaw harsa thlanchhuah 2383 hnenah sem mek a ni. Vawiin khan chhungkua 44 (Nausel-3, Sihphir-16, Sihphir Vengthar-6, Sihmui-10 leh Lengpui-9) hnenah rangva bundle 176 sem a ni a, bundle 1-ah rangva 32 zel a awm a ni. Heng chhungkua thlanchhuahte hnenah Pu John Rotluangliana, Pu R.Lalrinawma leh AMC Councillor Pu Lalzirliana ten rangva bundle 4 theuh an hlan a ni.
