Finance Minister Pu H. Liansailova, bialtu MLA ni bawk chuan tukin zing dar 7 khan Ramhlun North Branch YMA insak Platinum Jubilee in a hawng. He in Ramhlun North thlanmual mawng ami hi mi harsate luah tura sak a ni a; 40 ft x 12 ft a lian, chhawng 1-a sang niin chhungkaw 4 luah tura ruahman a ni a, Rs. 5,24,769/- senga sak a ni.

Pu Liansailova chuan Mizo khawtlang nunah inpui tawna mi harsate khaichhuak thin kan nih kan la chhawm nung zel hi thil lawmawm tak a ni tih a sawi a. Kohhran leh pawl hrang hrangten retheite tanpuiin hma kan la a, kan hnam zia duhawm kan la chhawm nung zel a ni tiin a pumpui huapin YMA hi hnam zia chhawm nungtu pawl pawimawh a ni a ti bawk. Khawtlang inlungrualna leh thawhhona tha hian malsawmna a thlen thin tih sawiin in luahtu turte chu duhsakna a hlan a. Pu Liansailova hian he in luah tura Ramhlun North Branch YMA in a lo thlan chhungkaw 4 te hnenah chabi a hlan nghal a ni.

YMA Platinum Jubilee in hi ni 15 Oct, 2010 khan sak tan niin he in sakna atan hian MLA Fund Rs. 2,00,000/- hmuh a ni a, Rural Development Department atangin rangva bundle 4 hmuh a ni bawk. A bak zawng chu Branch YMA executive committee leh YMA member tin te bakah Ramhlun North Presbyterian Kohhran te, MUP Ramhlun North Unit te, Ramhlun North Local Council leh mimal tlawmngaiten an thawhkhawm a. He in sakna atan hian YMA hnatlang vawi 5 neih niin tha 343 sen a ni a; a ban leh a beam-ah RCC hman a ni a, a chung rangva, a bang tile niin a chhuatah thingphel hman a ni.

YMA Platinum Jubilee in hawnna hi Pu Tlangtimawia, Ramhlun North YMA President in a kaihruai a. Bialtu AMC Councillor Pu Lalthanliana te, sorkar official thenkhat te leh Ramhlun North Local Council member te, Ramhlun North Presbyterian Kohhran hruaitute leh tlawmngai pawl hrang hrang hruaitute an tel a ni.