Rangvamual leivung paih chungchanga Aizawl District Disaster Management thuchhuah chu a hnuai ami ang hi a ni :
Chanchinbu thenkhat a Rangvamual leivung paih chungchangah mipuite hriata sawifiah tul a awm a. Hetiang hi thil awmdan a ni.
He kawngpui hi Mizoram mipuite za-a sawmriat in kan rin ber a ni a, a tlang loh chuan nitin mamawh kan lakluhna ber a nih avangin thal laia tha taka laih tlang a nih loh chuan fur a a pin mai hi a hlauhawm hle a ni. Kan ram hruaitute pawhin an ngaipawimawh in an ngaihven hle a. Hemi avang hian Aizawl District Admin. pawh an chungah kan lawm hle a ni. Lei paihna hian a thlanga Concrete Building chu a deng deuh thin a, a in neitu pate pawhin District Disaster Management Authority Chairman pawh an hmu a. An paihna hi sawn an rawn dil a, amaherawh chu technical lam mithiamten an paihna hi an sawn chuan a min belh teuh thei dawn nia an hriat avangin a paihna hi sawn theih niin an ngai lova. Chuvangin a in neitupa pawh hi a duh ang tawka a in venhim nan fencing siam tur leh a senso zawng zawng chu District Disaster Management Authority in a tum sak tur thu hrilh a ni a. Leivung paihna sawn a nih loh chhan hi pawisa harsat vang a nilo. Tin, leivung hi tuna palh a nih loh chuan fur ah chuan he in hi leimin in a hnawl mai theih dinhmun ah a ding a ni.
Kan Opposition Leader zahawm tak pawhin Aizawl DC leh District Disaster Management Authority Chairman ni bawk pawh rawn hmu in an sawi dun a. DC chuan a aia tha paih dan leh a problem solve dan an hriat chuan an thurawn chu a dawnsawn theih reng thu a hrilh a. Amaherawhchu, solution tak tak hi uluk takin an sawi dun pawhin an hmu zo mai lo a ni.
JCB a chhiat chungchangah hian Police te hian inquiry an ti a, an rinhlelhte an ko mai a ni a, tumah Lock-up a riah tir leh Jail a khung pawh an awm lo a ni.
Rangvamual leimin hian Zoram mipuite min tibuai rei ta hle a, chuvangin furpui thlen hma ngeia mipui tana paih fai thuai hi a tul avangin mipuite hriatthiamna leh tawiawmna Aizawl District Disaster Management Authority chuan a ngen tak meuh meuh a ni.
