Lunglei District chhung khawthlanglam Kawlhawk khuaa loneitute thlawhhmaa rannung puang chu vawiin khan Lunglei Agriculture Department thawktuten a hmunah an enfiah. 

Heng rannungte hi tun kar chho atanga puang tan an nih thu leh Buh leh thlai dang a bawm nasat thu loneitute hian an sawi a, Lunglei District Agriculture Officer Pu Tlangtimawia Zote leh Officer-te bakah thawktu dangte chuan hmun thumah inthen darhin Kawlhawka thlawhhmate hi an enfiah a, thawktute hian an sawi danin hetiang rannung hi Mizoramah an la hmuh ngai loh thu leh  Beetle chi khat Soldier Beetle a an teuh ber thu an sawi a ni. 

Heng rannung thlalakte hi Hyderabad a Agriculture hmunpuiah DAO leh a thawhpuite hian thawn nghalin Laboratorian te chuan thlai eichhe chi rannung a nih loh thu leh ngaihmawhawm a nih loh thu an rawn sawi nghal a ni. 

Heng rannungte hian lo-a chet vel leh hnathawh a tih harsat avangin a hnawhdarh dan tur an ngaituah nghal a, Agriculture Dept. a thawktute hian a kahna  hmanrua Sprayer leh Organic rannung thahna pein an kap nghal a,  a tul anga hmalak zui zel an tum a ni.