Nimin khan Mizoram College of Nursing (MCON) Falkawn chuan B. Sc. (Nursing) zirchhuak te thlahna Graduation leh B.Sc. (Nursing) zir tur thutiam lakna 'Lamp Lighting Ceremony'  an nei a, he programme hi Health & Family Welfare Minister Dr. R. Lalthangliana'n a hmanpui a ni.

Health Minister Dr. R. Lalthangliana chuan B.Sc. (Nursing) zirlai 30 rual, tha taka an zirlai zo ta te chu duhsakna hlanin Mizo nurse te chuan ramchhung damdawi in lian ah hriat an hlawh thu te, miin an hnathawh an fak thu te leh nurse chhawrtlak tak mahni hnaa in pe zo nia hriat an hlawh dante te sawiin zirlai pass chhuak te chu Mizoram pawm hneh taka dai dar ngam turin a chah a. A tirah chuan ram dang leh state danga thawh te hi a hrehawm a mahse thawh reng dawn chuan lunglen loh te, tawng thiam tumna te, tih tak zeta hlawhtlin tumna lian tak neih a ngai  tiin zirlai pass chhuak ta chu hrilhin chutiang chona lian tak hmachhawn ngam turin a fuih a. Sub Centre zawng zawng chu Health & Wellness Centre ah hlankai tum anih tih sawiin kumin chhungin Sub Centre 40 chu hlankai tum ani a, hetah te hian B.Sc. (Nursing) te tan thla ruk dang a bika training an patlang hnua hengah hotu angin hnaa an hmuh theih thu a sawi lang a ni.

Dr. R. Lalthangliana chuan nurse zir tura thutiam la thar te chu an thutiam lak hre reng a, Pathianin mawhphurna lian tak a pek chu tha takin, a taka an hnaah lantir turin a chah a. Nurse hna chu damlo enkawl leh bawihsawm anih angin hemi kawngah hian Lal Isua hnungzui tute an ni tih sawiin an hnaah hmangaihna leh duhsakna lan tira, Lal Isua tih dang rawngbawlna a taka lan tir tu anih nih chu theihngilh loh turin chah a. Nurse te tan dam taka, damlote biang biak a pawimawh thu te, hawihawmna  neia tawngkam uluk thu te pawh a sawi bawk a ni.

Health Minister chuan Health & Family Welfare Department chu Department pawimawh tak mitin nghawng anih thu te tarlangin Department  hnathawktu indaihlohna chu theihtawp chhuahin post ruak leh mamawh te hnawhkhah phalna Sawrkarin a bik takin a pek thu a sawi a. Heng zingah hian Nurse te, Health Worker te, MBBS doctor leh Dental doctor te leh thawktu dang bakah Zoram Medical College tih changtlun nan post engemaw zat lak phalna Sawrkarin a pek thu a sawi lang bawk. MCON panna kawng chu cheng nuai 18 sengin thawh vat anih tur thu sawiin College mamawh hrang hrang pawh a tahtawlhin Sawrkarin tih hlawhtlin a tum thu a sawi tel bawk a ni.

B.Sc.(Nursing) passed zirlai te hnenah Dr. Lalhmangaihi, Director, Hospital & Medical Education chuan lawmpuina hlanin Pi K. Lalbiaknguri, Nursing Superintendent, State Referral Hospital, Falkawn chuan zirlai thar thutiam lak 'Lamp Lighting Ceremony' a kaihruaiin Pi Lalchhanhimi, Principal, MCON chuan MCON chanchin leh dinhmun te tarlangin hun a hmang a  ni.

Kum 1980 a din Nursing School, Civil Hospital, Aizawl chu 2005 khan college a hlankai niin Mizoram College of Nursing tih a ni a, College a hlankai a nih hnuin B.Sc. (Nursing) mi 320 in an passed chhuak a, Mizoram bakah India rama damdawi in lian bakah ram danga thawk mek engemaw zat an awm bawk a ni.