State Election Commission chuan Sinlung Hills Council thar siam tura inthlanna buatsaih ani tur thu, October ni 1, 2019 a chhuah a, he inthlan atana Notification chu nimin khan an tichhuak a ni.

State Election Commission (SEC) chuan he Inthlan chuh tumte tan 10.10.2019, tlai dar 3 thleng hming pek luh theih a ni. Hming pek luhte hi 11.10.2019 chawhnu dar thum hnulam atangin endik tan a ni ang a, inhnukdawh duhte tan 14.10.2019 tlai dar 3 thleng hun hawnsak an ni ang. Hemi ni vek, tlai dar 3 hnua lamah candidate te hi symbol pek an ni anga, inthlan chuh tur te hming list pawh tar ani nghal ang. Inthlan chu 5.11.2019, zing dar 7 atanga tlai dar 4 thleng neih tur a ni a. Hemi ni vek hian Ballot Box zawng zawng Constituency Headquarters a thlen vek hnua vote tla te chhiar a ni ang.  Inthlan that (re-poll) ngai a awm a nih chuan November ni 7 ah re-poll neih a ni ang. Re-poll neihna hmuna vote tla te chu hemi ni vek hian Ballot Box zawng zawng Constituency Headquarters a thlen vek hnua vote tla te chhiar a ni ang.

Sinlung Hills Council hnuaia hian Constituency 12 a awm a, chungte chu – Khawlian, Phuaibuang, Suangpuilawn, Vanbawng, Ratu, New Vervek, Sakawrdai South, Sakawrdai South, Zohmun, Tinghmun, Saipum leh Saiphai te an ni a. Polling Station hi 38 awmin, chung zinga 31 chu Aizawl District ah awmin a dang 7 chu Kolasib District huam chhungah a awm an ni.

Sinlung Hills Council Final Electoral Roll chu 30.09.2019  a chhuah niin he inthlanpui a vote thlak thei chu mi 20914 an ni a, chung zinga 10509 chu mipa niin, 10405 chu hmeichhia an ni.

Inthlanna muanawm leh felfai a awm theih nan dan leh thupek kenkawh kawnga mawhphurtute chu a tul anga hma la tura tih an ni a, a bik takin Magistrate leh SP te chu ruahmanna tul ang zawng zawng siam tura tih an ni. He inthlanna atan Mizoram Sawrkar hnuaia officer 24 chu Returning Officer (RO) leh Assistant Returning Officer (ARO) atan ruat an ni a. State Sawrkar senior officer 3 te chu Election Observer atan ruat an ni bawk a, anni hian inthlan chungchanga hma lakdan ngun takin an vil dawn a ni. Inthlanna ah hianBallot Box leh Ballot Paper te hman ani dawn.

Candidate tin te chu Election Campaign atana sum hmanral nitina chhinchhiah tura tih leh inthlanna result puan atanga ni 30 chhungin an sum hman dan report thehlut tura tih an ni anga. Candidate te’n campaign nana an sum hman theih zat hi Constituency khat zel ah Rs. 2,00,000/- bithliah a ni.

Sinlung Hills Council Inthlanna atana Model Code of Conduct chu SHC huam chhung-ah inthlan puan ni, October ni 1 atang khan hman nghal tur a ni a.

SEC chuan inthlanna fel fail eh muanawm tak a mawm theih nan inthlanna buaipuitute, Political Parties, Media, NGO-te leh SHC chhunga mipuite tawiawmna a ngen a. Mipui duhthlanna kaltlanga SHC inrelbawlna tha tak a awm theih nan theihtawp chhuah theuh turin mitin a sawm a ni.