2480/2022-2023
Champhai, the 31st October, 2022: Hnam Inpumkhatna Ni, Rastriya Ekta Diwas/National Unity Day 2022 leh Azadi Ka Amrit Mahotsav (AKAM) pualin tukin dar 7 khan District Adminstration buatsaihin Champhaiah Inpumkhatna Tlan -Unity Run buatsaih a ni.

Pi Esther Leihang, SDC & DLAO kaihhruaia Dawrkaikawn, Kahrawt Venga a khuhhawnna hun hmanah DEO Pu T.T Laltanpuia chuan thu sawiin, ram dang awpbehna ata India ramin zalenna a hmuh dante leh zalenna nei tura Sardar Vallabhbhai Patel-a hmalaknate a tarlang a. Rastriya Ekta Diwas chu kum 2014 atanga hman tan a nih thu sawiin, India ram puma he ni puala hun hman ruala Champhaia hun hman a ni thei chu lawmawm a tih thu a sawi a. Unity Run chu tlan ngawt nilo, inpumkhatna thuchah kengteltu atana hman tangkai a tul thu pawh sawiin, kalkhawmte chu India ram ropui taka siamtute hnathawh hre renga, an zirtirna leh thil hnutchhiahte chhunzawm thei tura tan la theuh turin a chah a; Rastriya Ekta Diwas - National Unity Day puala Unity Run neih chu a vailiam a ni.

Kharna hun Circuit House tualzawla neih hi Pi Esther Leihang, SDC & DLAO chuan a kaihruai a. Addl. DC & PD, DRDA Pu B.Lalchhawntluanga kaihhruaiin Rashtriya Ekta Diwas pual inpumkhatna, dikna leh thianghlimna chhawmnung leh ram venhim kawnga hma la tura thutiam lak a ni a. DIPRO Dr. Lallawmkima chuan lawmthu sawiin hun a khar a ni.

Unity Run-ah District Bawrhsap Pu James Lalrinchhana hovin Govt. Champhai College NSS, Govt. GM Higher Secondary School leh Govt. GM High School Zirlaite, NYK Champhai Volunteer leh Official-te, an vaiin mi 400 bawr vel an tel thei a. Dawrkaikawn, Kahrawt Veng atanga tlan tanin Circuit House, Bethel Veng, Champhai thleng an tlan a. He hunah hian inpumkhatna awmzia leh chhawmnun zel a pawimawh thute uar taka inzirtir a ni.

Rashtriya Ekta Diwas (National Unity Day) hi India ram inpumkhatna atana thawhhlawk tak  Deputy Prime Minister of India leh Home Minister of India hmasa ber, Sardar Vallabhbhai Patel, Iron Man of India ti a vuah pianchamphaphak October ni 31 puala hman thin a ni a. India ram inpumkhatna, dikna leh ram ralmuanna vawnhim kawnga intuaithar nana hman thin a ni a. He ni denchhen hian Rashtriya Ekta Diwas Parade chu Statue of Unity, Kevadia, Gujarat-ah buatsaih a ni a. Heng bakah hian India rama District 750 ahte mi chi hrang hrangte huapzo, unity run mi 75,000 thleng tel theihna tur huaihawt a ni.