1860/2024-2025

Aizawl, the 2nd September, 2024: Directorate of Women & Child Development buatsaihin vawiin chawhma dar 11:00 khan Rashtriya POSHAN Maah/Nutrition Month 2024 hawnna hun Women & Child Development (WCD) Office, Tuikhuahtlang, Aizawlah hman a ni a. He hun hi Pi Lalzarmawii, IAS, Commissioner & Secretary, Social Welfare, Tribal Affairs, Women & Child Development Department chuan khuallian nia hmanpuiin Rashrtiya Poshan Maah 2024 hman tur chu a hawng a ni.

Khuallian Pi Lalzarmawii, Commissioner & Secretary, Social Welfare, Tribal Affairs, Women & Child Development Department chuan Poshan Abhiyaan chungchang leh thil tumte tarlangin, Rastriya POSHAN Maah hman turah lungrual tak leh theihtawp chhuaha hma la turin WCD a thawktute leh department dang thawhpuite a sawm a. Rastriya POSHAN Maah 2024 kalpui tur chu kan ram hriselna atana hmasawnna rahbi pawimawh tak a nih ngei a beisei thu leh hriselna, hmasawnna leh changkanna chu department kutah thui tak a innghah thu sawiin, thawktute chu rilru puitling tak pua mipui tana duan programme siamte chu zirchianga a hlawhtlin nana theihtawp chhuah turin a sawm a ni.

POSHAN Maah hawnna hun hi Pi Zoramthangi Chhangte, Director, Women & Child Development chuan kaihruaiin Rashtriya Poshan Maah hman a lo nih tawh dan leh Department dangte nena thawhhona tha tak hnuaia hmalakho a lo nih tawh dante tarlangin, an tawiawmnaah lawmthu a sawi a. Kumin atana thupui thlan 'Overall Nutrition' hnuaiah hmalak dan tur theme hrang hrang duan a nih thu sawiin, department hmalaknate chu mipui nun khawih thil, an tana malsawmna, damna leh himna a nih avangin thawktute chu an hmazawna tihtur theuhte theihtawp chhuaha tha taka hlen chhuah tum turin a sawm a ni.

He hunah hian Pi Sailopari, Dy. Director, WCD chuan POSHAN Maah chhunga Mizoram hmun hrang hranga State Level, District Level, Block/Project Level leh Anganwadi Centre/Village Level-a hmalak dan tur kimchang tarlanna 'Activity Calendar' a sawifiah a. Pi Zonunpari Sailo, Jt. Director, WCD in lawmthu sawiin hun hman a khar a ni.

Rastriya POSHAN Maah 2024 ah hian thupui thlan 'Overall Nutrition' hnuaiah hmalakna tur theme hrang hrang 5 hetiang hian duan a ni:-
1. Anaemia (Thisen tlakchhamna beih kawnga test runpui)
2. Growth Monitoring (Thandan endik runpui)
3. Complementary Feeding (Nau chaw hrai dan chungchang)
4. Poshan Bhi Padhai Bhi (Chaw tha pe la zirtir rawh)
5. Technology for Better Governance, Transparency and Efficient Service Delivery (Infrastructure, Service Delivery, Mobile & Aadhaar Verification) te a ni.

POSHAN Maah (Nutrition Month) hi Sawrkar laipui Ministry of Women & Child Development hnuaia Nutrition Mission lian tak POSHAN Abhiyaan hmalakna zinga programme pawimawh tak pakhat niin, kum tin September thla chhunga hman thin a ni a. Kumin hian a tum 7-na atan Ministry of Women & Child Development ruahman angin Poshan Maah 2024 hi hman leh tum a ni.