Vawiin khan PHED Department, Mamit hmalakna-in Rawpuichhip khua-ah Faina chungchang inzirtirna, Dustbin sem leh Children Sanitation Club dinna hun hman a ni.
Dustbin semna hunah hian Er Lalzawmliana, EE PHED, Mamit chuan Mamit District mipuite faina atana Children Sanitation Club kalpui chhoh dante, Tui Supply, bawlhlawh sawngbawlna hmun an siam hrang hrangte tarlangin PHED Department te hmalakna chu khawtlang mipui te'n tha taka an thawhpui a tul thu a sawi a, Faina chu thianghlimna leh hriselna anih angin thuawih taka chhungtin te'n a hmun taka bawlhlawh an paih theihna turin Dustbin chhungtinte hman tur leh Community Dustbin semna a nei nghal a ni.
Pi Laltharzeli, Ambassador SBM pawhin thusawiin Rawpuichhip chu khawfai tak an ni a, chu chu chhunzawm zelin kawtchhuah an nih avangin Mamit District tana darthlalang pawimawh tak an ni a, kawngpui dunga Hotel hmunhma leh eiturte thianghlim leh felfai taka buatsaih thin tura chahin, kan tuihna te humhalha, thingphun uar deuh deuh turin a sawm a ni.
He hun Rawpuichhip Community Hall-a neih hi Pu Lalzuala SDO PHED, Mamit chuan kaihruaiin Rawpuichhip khua chu PHED kaltlanga hmalakna hrang hrangah te thawhpui nuam tak an nih thu a sawi a, Rawpuichhip khawtlang nu leh pa mi 300 chuang an tel a ni.
Vawiin vek hian Pu Lalropuia VCP Rawpuichhip kaihruaina-in Children Sanitation Club hi din nghal niin naupang 200 chuang an tel a, Khawtlang hruaitute, PHED Staff, Forest Department leh NGO hrang hrangte nen Rawpuichhip kawnpui Hotel-ah hnatlang neihzui nghal niin, hnatlangte hian thingtiak thahnem tak phun nghal a ni.
He hunah hian Pu Peter Lalmuanzova, Consultant SBM(G) chuan PHED Department hmalakna tlangpui sawifiahna a nei bawk
Attachment
- Loading attachment...
