Vawiin hian Pi Seemantinee Sengupta, Scientist-G, Mizoram State Co-ordinator, National Informatics Centre, New Delhi chuan Serchhip a rawn tlawh a. Pi Sangchhin Chinzah, District Bawrhsap leh Pu Lalruatmawia Zadeng, District Informatics Officer, Serchhip chuan lo dawngsawngin inkawm hona hun an nei.

Bawrhsap Pi Sangchhin Chinzah chuan Pi Seemantinnee in Serchhip a rawn tlawh chu lawmthu a lo hrilh a. Inthlan leh sawrkar hmalakna kawng tam takah NIC tangkai taka hman thin a nih thu lo hrilhin, NIC tihhmasawn zelna kawngah district thuneituten theih tawp chhuaha lo tanpui a inhuam thu a hrilh a ni.

Pi Seemantinee hian Serchhip District hmasawnna atan District Hospital ah ‘e-hospital’ kalpui  tum anih thu a sawi a. Hei hian damlo enkawl tawhte medical record chu awlsam tak leh rang taka en let mai theihin thawktute a pui thei dawn a ni, a ti a. Revenue Department ten Land Records an neihte pawh computerize vekna tur ‘e-ram’ pawh buaipui mek anih thu sawiin, hetah hian Revenue Department in record an neih zawng zawng dah luh vek a ni anga, ram inneih thuah leh ramri buai vel chin fel nan a tangkai hle dawn  ani, hemi atan hian Serchhip hi Pilot Project ah hman a ni nghe nghe, a ti bawk.

Pi Seemantinee hi Dr. RK Das, Scientist-F, Mizoram State Informatics Officer leh Pu Lalthathanga, Scientist-E, District Co-ordinator ten an rawn tawiawm a. District Bawrhsap nen inkawm hona an neih hnu hian NIC Serchhip District thawktute nen inkawm hona hun an hmang leh a ni.