Reserve Bank of India (RBI), Mumbai leh Department of Economics, MZU te tangkawpa huaihawt National Seminar on RBI Annual Report 2014-2015 chu vawiin khan Administrative Conference Hall, MZU ah neih a ni a, Finance Minister Pu Lalsawta’n a hmanpui.
Khuallian Pu Lalsawta chuan ram pum sumpai kalphung enkawltu RBI hnathawh dan leh hmalak dan te mipui hnena hrilhhriat nana Mizoram hmun kilkhawr taka RBI ten Annual Report 2014-2015 Seminar an rawn buatsaih chu lawmawm tiin hemi lama mithiam Economics professor leh zirlai ten an hlawkpui ngei a beisei thu a tarlang a. Mizoram sum dinhmun chu siamthat ngai a nih avangin sum hmanna tihtlem a, a lakluhna lam ngaihtuah a tul avangin kan nunphung leh kalphung te pawh tihdanglam a tul dawn a ni, a ti. Greece ram sum dinhmun tlakchhiatna chhan chu an tlin tawk aia sanga an khawsak vang a ni, tiin Mizoram pawhin an hnung zuia kan kal loh nan fimkhur taka kan kal a tul a ni, Minister chuan a ti. RBI hmalakna thang chho zel karah kum 1981-a thawktu 35,000 awm thin kha vawiin ah chuan 16,700 chauh thawkin an kengkawh thei a, Mizoram Sawrkar tan entawn tur pawimawh tak a awm a ni, a ti bawk. Mizoram mipui, sawrkar hnathawk leh mithiam te chu Mizoram sumpai dinhmun siamthat nana ngaihtuahna senga rawtna te thehlut turin Minister chuan a sawm bawk a ni.
RBI Annual Report 2014-2015 Seminar hi HoD, Economics Prof Vanlalchhawna’n a kaihruai a, RBI atanga lo kal Pu B.M.Mishra, Principal Adviser leh a thawhpui ten RBI chungchanga thupui hrang hrang te an sawifiah a, MZU Economics zirtirtu leh zirlai te nen hun hmang hovin zawhna leh sawihona hun tha tak an hmang bawk a ni.
RBI hi ram pum sumpai kalphung enkawltu thuneitu sang ber a ni a, bank zawng zawng enkawltu leh viltu niin kum tina Annual Report an buatsaih thin hmangin ram pum leh state hrang hrang sum dinhmun zirchianna te an telh thin a ni. RBI hnathawh dan leh kalphungte mipui hnena inhrilhhriat nan kum tinin hmun hrang hrangah seminar te an huaihawt thin bawk a ni. RBI chungchang thlir duh tan website www.rbi.org.in ah a duh apiang tan en theih a ni.
RBI Central Board Meeting chu thla leh ah hian Aizawl ah neih tura ruahman a ni a, RBI Governor Dr Raghuram Rajan pawh lo kal tura beisei a ni.
