Vawiin khan Kolasib District chhunga faina leh thianghlimna chungchanga hmalakna tur leh hemi chungchanga hmachhawp pahnih District Swacch Bharat Mission (Urban) hnuaia Swacch Bharat Mission Cleanliness Week leh District Swacch Bharat Mission (Rural) hnuaia Sanitation/Cleanliness Campaign te hman dan tur sawiho turin leh heng programme te hmanna kawnga ruahmanna te siam turin heng Mission pahnih hnuaia Committee-te chu a rualin Kolasib DC Conference Hall ah meeting an nei.

Meeting-ah hian Kolasib DC Pu Jitender Yadav chuan kum thum chhung Mizoram a awmchhung hian faina leh thianghlimna kawnga Mizoram leh Mizo mipuite hnathawh leh hmalaknate chu ramchhung hmun dangte tan entawntlak nia a hmuh thu sawiin, hemi kawnga tlawmngai pawl leh khawtlang hruaitu hmalakna leh inpekna chu fakawm a ti a, faina leh thianghlimna atan hun remchang leh Ni hrang hrangte denchhen a hnatlang koh hian nasa takin rah tha a chhuah nia a hriat thu sawiin hei hi ropui a tih thu a sawi bawk.

Meeting hian heng programme pahnih te hi hawnna October ni 2, zing dar 7:00 ah Venglai Bazar-ah neih nise tih te, Swacch Bharat Mission Cleanliness Week (October ni 2 – October ni 9) chhunga veng leh sikul fai thlanna neih nise tih te, October ni 2 hian VC ten hnatlang koh tura ngen nise tih te, Sawrkar Pisa hrang hrang a thuneitu te faina leh thianghlimna kawnga an office ah theuh hma la tura ngen nise tih te leh District Swacch Bharat Mission(Rural) chuan khaw hrang hranga Village Water & Sanitation Committee te kokhawma, Cleanliness Campaign hman dan tur hrilhhriat nise tih te an rel a ni.

Meeting ah hian Committee Kolasib SP Pu C. Lalzahngoa, PHE EE Pu F. Sanglura, District Urban Development Officer aiawh bakah Kolasib khaw chhunga VCP te leh tlawmngai pawl hrang hrang leh MJA hruaitute an tel bawk a ni.

Kolasib khawpui leh khawpui dangte (urban areas) chhungah hian Swacch Bharat Mission Cleanliness Week 2015 hi October ni 2 leh October ni 9 inkara hman tur a ni a, hemi rual hian Kolasib District-a thingtlang khua ah te Sanitation/Cleanliness Campaign hi October ni 25 atanga October ni 9 inkara hman tur a ni.