State Council of Educational Research and Training (SCERT) buatsaihin vawiin khan Mizoram pum huapa school hrang hrangte inelna State Level Science Seminar chu SCERT Conference Hall-ah neih a ni a. Education changtu Parliamentary Secretary Pu Joseph Lalhimpuia chu khuallian a ni.

Pu Joseph Lalhimpuia chuan ziak leh chhiar thiam tamna state nih ringawt a tawk lova, Mizoram hian mi thiam bik, subject thlan bika mithiam kan mamawh, a ti. Mizoramah hian lei hnuai hausakna, thing leh mau leh nungcha lama hausakna haichhuak tur mi thiam bik kan mamawh tiin zirlaite chu certificate hmuh chauh buaipui lova tum sang tak nei a, an kawng thlanah ram tana chhawr nahawm khawpa mi thiam bik nih tum turin a fuih a. Science leh technology a sang ram apiang an ropui tiin zirlai kalkhawmte hnenah hnam dangte neih ang finna an neih chu taihmakna leh thahnemngaihna nen tipunga, tan la thar turin Parliamentary Secretary chuan a sawm a ni.

State Level Science Seminar hi SCERT hian kum 1979 atang khan a lo huaihawt tan tawh a, tum tum hi a vawi 35-na a ni. District level-ah inelna neih hmasak niin District tina pakhatna leh pahnihna te chu State level-ah an inel leh a. Heta pakhatna leh pahnihna te hi rampum huap inelna National level-ah Mizoram aiawhin an tel ang. Tun tumah hian Serchhip, Kolasib, Champhai, Saiha, Lunglei leh Aizawl District atangin naupang 12 an tel a ni. Kumin hian thupuiah “Harnessing Light: Possiblities & Challenges” tih an hmang a. He seminar in a tum ber chu naupangte thinlunga science ngainatna tuh te, thil thar ngaihtuah chhuah chakna neih tir te, ram chhung hmun danga mite nena inkawmngeih tir leh an talent-te phochhuahna remchang siam sak a ni.

State Level Science Seminar ah hian pakhatna chu Lalthanzami Hauhnar, St James Hr. Sec. School, Aizawl; pahnihna T Lalhlimpuiii St Johns Hr.Sec.School, Kolasib; pathumna Swagatalokhi Bhattacharya, Sacred Heart School, Lunglei a ni. Pakhatna hian cheng 5000, pahnihna in cheng 3000, pathumna in cheng 2000 an dawng a ni.