Vawiin chawhnu dar 1 khan Rural Development leh line department hrang hrang hotute chuan RD Minister Pu R.Lalzirliana hovin Secretariat Conference Hall-ah MGNREGA leh sawrkar scheme dang kaikawpa hna tha leh hlawkpuiawm zawk thawh a nih theih dan tur an sawi ho va. RD changtu Parliamentary Secretary Lt Col. ZS Zuala pawh a tel.

He hunah hian district hrang hranga DRDA Project Director-te leh line department hotute’n report pein, kum 2015-16 chhunga Convergence Plan hlawhtlin dan leh harsatna awm te, kum 2016-17 atana hma chhawp hrang hrangte sawi ho a ni a. Kum kal taah line department-te leh RD Department inkara inbiak pawhna tha tawk lo leh hna thawhna tur sum hmuh inrual lovin hna a tihkhaihlak thu te tarlan niin, kum tharah chuan tha zawka inrawn tlanga thawh ho ni se, tih a ni.

Kum thara hna thawh tur ruahman lawkte chu tha taka thawh a nih theih nan line department-te chuan hma lak an inhuam thu an sawi a. Hna thawh dan tur chungchanga rawtna an neihte pawh he hunah hian ngaihtuah ho a ni.

Sawrkar laipui Rural Development Ministry chuan kum 2014-15 kha ‘Year of Convergence’-ah puangin, hemi denchhen hian ‘Convergence of MGNREGA with Other Schemes’ chu kalpui tan a ni a. Mizoram sawrkar paw’n hei hi zui ve nghalin, ‘Mizoram State Convergence Plan 2016-2017 under MGNREGA’ pawh duan a ni tawh a. He plan hnuaiah hian scheme hrang hrang 13-ah MGNREGA nen tang kawpa hna thawh a ni dawn a. Line department-te’n scheme hlawhtlin nana sum leh hmanraw tul dangte tumin, MGNREGA hnuaiah mipuite’n tha an thawh thung ang.

Vawiin Convergence meeting-ah hian RD Department leh line department hrang hrang hotute an tel kim hle a ni.